Elimizde zeınetaqy qansha paıyz ósti

ASTANA. KAZINFORM — Elimizde búginnen bastap bazalyq zeınetaqy 6,5%-ǵa, yntymaqty zeınetaqy — 8,5%-ǵa ındeksteldi.

2025 — 2027 jyldarǵa arnalǵan respýblıkalyq bıýdjet týraly zańda 1 qańtardan bastap memlekettik járdemaqylar men bazalyq zeınetaqy tólemderiniń barlyq túrin QR Ulttyq Banki aıqyndaıtyn ınflıatsııanyń boljamdy deńgeıine sáıkes 6,5%-ǵa, yntymaqty zeınetaqyny — 8,5%-ǵa, ıaǵnı ınflıatsııa deńgeıinen 2%-ǵa oza otyryp arttyrý kózdelgen.

Budan basqa Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqyny eń tómen kúnkóris deńgeıiniń 70%-na deıin, eń joǵarysyn — 120%-yna deıin jyl saıyn kezeń-kezeńimen arttyrý kózdelgen.

Soǵan saı búginnen bastap bazalyq zeınetaqynyń eń tómen mólsheri eń tómen kúnkóris deńgeıiniń 65%-nan 70%-ǵa deıin ulǵaıtylyp, 32 360 teńgeni qurady. Eń joǵary mólsheri eń tómen kúnkóris deńgeıiniń 105-ten 110%-yna deıin arttyrylyp, 50 851 teńgeni qurady.
Mysaly, 2019 jyly zeınetkerlikke shyqqan 69 jastaǵy zeınetkerdiń 2024 jyly bıýdjetten tólenetin zeınetaqy mólsheri 156 856 teńgeni qurady, onyń ishinde bazalyq zeınetaqy tólemi

— 45 578 teńge, yntymaqty zeınetaqy — 111 278 teńge. 

2025 jylǵy 1 qańtardan bastap ósimdi eskere otyryp, osy zeınetker úshin zeınetaqynyń jalpy somasy 171 588 teńgege deıin ulǵaıady, onyń ishinde bazalyq zeınetaqy — 50 851 teńgeni, yntymaqty zeınetaqy — 120 737 teńgeni quraıdy. 

Atalǵan somalarǵa BJZQ-daǵy tólemder kirmeıtinin atap ótý mańyzdy.

2025 jyly zeınet jasy ózgermeıdi: erler — 63 jas, áıelder — 61 jas.