Elimizde zańsyz altyn óndirýden qansha shyǵyn keldi
ASTANA. KAZINFORM — Qazaqstanda altynnyń zańsyz aınalymy faktileri boıynsha 2020 jyldan 2023 jylǵa deıin 7 qylmystyq is tergeldi, onyń tórteýi sotqa jiberildi. Shyǵyn 1,5 mlrd teńgeden asty. Búgin Senattyń jalpy otyrysynda depýtat Andreı Lýkın Úkimet basshysy Oljas Bektenovtiń atyna osy másele boıynsha saýal joldady.
Bas prokýratýranyń málimetinshe, keıingi 4 jylda ishki ister organdary baǵaly metaldardyń zańsyz aınalymy men óndirilýi jáne urlanýyna qatysty 133 qylmystyq quqyq buzý deregin tirkegen. Qazirgi kezde elimizdiń aýmaǵynda 42 altyn óndirýshi kásiporyn bar. QR Qarjy monıtorıngi agenttiginiń aqparaty boıynsha 2020-2023 jyldar aralyǵynda altynnyń zańsyz aınalymy derekteri boıynsha 7 qylmystyq is tergelip, 4 is sotqa joldandy. Shyǵyn 1,5 mlrd teńgeden asty», - dedi Andreı Lýkın.
Depýtat Aqmolada oblysyndaǵy Bestóbede zańsyz altyn izdeýshiler tapqan altyn ónimderin satyp alýmen aınalysatyn qylmystyq topty joıý týraly 2023 jyldyń qarasha aıyndaǵy isti mysalǵa keltirdi. Osy altynnan jasyryn tsehtarda jasalǵan buıymdar belgili brendterdiń ataýymen Astana men Shymkent saýda úılerinde satylatyny anyqtaldy. Tintý barysynda 1 keliden astam altyn men 100-den astam túrli zattar tárkilendi.
Senator mundaı zańsyzdyqpen kúresý úshin altyn kenishterine baqylaýdy kúsheıtý qajet ekenin atap ótti.
«Esepteý kezinde zańdy óndirilgen árbir úsh tonna altyn shamamen zańsyz óndirilgen bir tonnamen qatar júretin bolyp shyqty. Bul kórsetkish elimizdiń aýqymynda jylyna shamamen zańsyz óndirilgen 25 tonna altyn kólemine teń. Bul máseleni sheshýdegi negizgi sharalardyń biri – obektilerde baqylaýdy kúsheıtý. Onyń ishine qosymsha beınebaqylaý kameralaryn ornatý, shahta uńǵylaryna talshyqty-optıkalyq jeli baılanysyn salý, kirý alańyna baqylaý júıesin engizý, tekserý keshenin paıdalaný, qosymsha qorshaý ornatý, adamdardy avtomatty túrde anyqtaıtyn quraldardy engizý jáne basqa da qaýipsizdik sharalary kiredi», - dedi senator.
