Elimizde zańger mamandardyń neshe paıyzy jumysqa ornalasqan
ASTANA. KAZINFORM – Elimizde zamanaýı talaptarǵa sáıkes keletin bilikti zańgerler asa qajet. Bul týraly búgin Senatta zań biliminiń sapasyn arttyrý taqyrybyndaǵy ǵylymı-praktıkalyq konferentsııada senator Nurlan Beknazarov aıtty.
«Memleketimizdiń Quqyqtyq saıasatynyń 2030 jylǵa deıingi tujyrymdamasynda zańgerlik bilim berýdiń sapasyn jetildirý Qazaqstannyń quqyqtyq júıesin ornyqty damytýdyń negizgi sharty sanalatyny atap ótilgen. Barshamyzǵa málim, keıingi jyldary joǵary zańgerlik bilim alý salasy synǵa ushyrap keledi. Jalpy alǵanda, aýqymdy reformalar joǵary bilimniń odan ári damýyna jańa serpin berdi. Tıisti joǵary oqý oryndary sanynyń ósýi azamattarymyzdyń joǵary bilimge degen suranysyn qanaǵattandyrǵanymen, mamandardy daıarlaý sapasyna teris áserin tıgizbeı qoımady, ol ásirese keıbir jekemenshik joǵary oqý oryndaryna qatysty. Sot jáne quqyq qorǵaý júıelerin reformalaý, sondaı-aq ulttyq zańnamany damytý jaǵdaıynda elimizge zamanaýı talaptarǵa sáıkes keletin bilikti zańgerler qajet. Sebebi quqyqtyq tártip pen azamattardyń konstıtýtsııalyq quqyqtary men bostandyqtaryn sapaly qorǵaý, bilikti zańgerlerdi daıarlaý deńgeıine tikeleı baılanysty», — dedi N. Beknazarov.
Senatordyń aıtýynsha, qazir «Quqyq» baǵyty boıynsha kadrlardy daıarlaıtyn joǵary oqý oryndarynyń sany 59-ǵa jetti. Keıingi 6 jylda Qazaqstanda 106 myńnan asa zańger daıyndalǵan.
«2023 jyly bitirgen túlekter sany 14 262-ni qurap, olardyń 57 paıyzy ǵana jumysqa ornalasqan. Memlekettik tapsyrys boıynsha oqyǵan túlekter sany 366 adam, qalǵandary aqyly túrde bilim alǵandar. Senat depýtattary osy máselege erekshe nazar aýdaryp keledi, birqatar is-sharalar da ótkizilip jatyr. Jýyrda osy másele Bas prokýratýra janyndaǵy Quqyq qorǵaý organdary akademııasynda birlesip talqylandy. Bir kóńil aýdaratyn másele — ol qoǵam men azamattardyń quqyqtyq saýattylyq mádenıetin kóterý jáne zańnamalyq ózgeristerge qatysty aqparattyq túsindirý jumystaryn kúsheıtý. Sonymen birge, qoldanystaǵy zańnamanyń normalarynyń mátinderin qarapaıym halyqqa túsinikti túrde jazylyp, qabyldanýy óte mańyzdy. Bul máselege kóńil bólip otyrǵanym, búgingi zańger túlekter bolashaqtaǵy zańnamalyq qyzmetke tikeleı qatysatyn azamattar. Sondyqtan zamanaýı talaptarǵa sáıkes keletin bilikti zańgerler asa qajet», — dedi depýtat.
