Elimizde zań buzǵan oıyn bıznesi basshylaryn jaýapkershilikke tartý sharalary kúsheıedi
ASTANA. KAZINFORM — Týrızm jáne sport mınıstrligi qarjylyq monıtorıng talaptaryn buzǵany úshin oıyn bıznesin uıymdastyrýshylardyń basshylary men jaýapty qyzmetkerleriniń jaýapkershiligin kúsheıtýdi kózdeıtin túzetý ázirledi.
Ózgeristerdi qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa jáne jappaı qyryp-joıatyn qarýdy taratýǵa qarsy is-qımylǵa baǵyttalǵan ishki baqylaý qaǵıdalaryna engizý usynylyp otyr.
Atap aıtqanda, joba boıynsha talaptardy buzǵany úshin tek uıymdardyń ózderin ǵana emes, olardyń basshylyq quramyn jáne osy saladaǵy zańnama talaptarynyń saqtalýyna jaýapty qyzmetkerlerdi de jaýapkershilikke tartý kózdelgen.
Mınıstrlik túzetýler FATF halyqaralyq standarttaryn eskere otyryp ázirlengenin túsindirdi. Aıta keteıik, uıymdarǵa da, sondaı-aq áreketi nemese áreketsizdigi zań buzýshylyqqa ákep soqqan laýazymdy tulǵalarǵa da sanktsııa qoldanýdy kózdeıtin norma 35-usynymda qarastyrylǵan.
Jańa normalar ishki baqylaý rásimderin uıymdastyrý men olardyń oryndalýyna basshylyq pen jaýapty qyzmetkerlerdiń jeke jaýapkershiligin bekitýge múmkindik beredi.
Qujat jobasy «Ashyq NQA» portalynda jarııalandy. Qoǵamdyq talqylaý 13 qarashaǵa deıin jalǵasady.
Eske salaıyq, buǵan deıin Astanada zańsyz oıyn bıznesin uıymdastyrýshylardan 124,8 mln teńgeden astam qarjy óndirilgenin jazǵanbyz.
