Elimizde volonterlikti damytýdyń jańa tujyrymdamasy ázirlenip jatyr
ASTANA. KAZINFORM – Qazaqstanda volonterlikti qoldaýdyń jańa tujyrymdamasy ázirlenip jatyr. Qujat eriktilik qozǵalysyn odan ári damytýdyń negizgi baǵyttaryn aıqyndap, salalyq volonterlikti kúsheıtýdi kózdeıdi. Bul týraly Astana qalasynyń kommýnıkatsııalar qyzmetinde ótken baspasóz májilisinde Ulttyq volonterler front-ofısiniń basshysy Aıbek Dosymbetov aıtty.
Onyń aıtýynsha, tujyrymdamaǵa engiziletin mańyzdy baǵyttardyń biri – salalyq volonterlikti damytý.
– Volonterlik qyzmet 14 baǵyt boıynsha júzege asyrylady. Qazirgi ýaqytta onyń 12 baǵyty boıynsha ádistemelik quraldar ázirlendi. Ótken jyly 8 baǵytqa, bıyl taǵy 4 baǵytqa arnalǵan ádistemeler daıyndaldy. Bul qujattar ár saladaǵy eriktilerdiń jumysyn júıeleýge múmkindik beredi, - dedi spıker.
Onyń sózinshe, mysaly, ekologııa baǵytyndaǵy eriktiler ekologııa departamentteri men salalyq mamandarmen birlesip óńirlerdegi ekologııalyq máselelerdi sheshýge atsalysady.
Al bilim salasyndaǵy volonterler bilim basqarmalarymen, medıtsına baǵytyndaǵy eriktiler densaýlyq saqtaý uıymdary jáne dárigerlermen birlesip jumys júrgizedi.
Sondaı-aq memlekettik organdar óz quzyretindegi volonterlik uıymdarmen turaqty baılanys ornatyp, eriktilerdi arnaıy oqytýdy uıymdastyrýdy josparlap otyr. Bul volonterlik qyzmettiń sapasyn arttyryp, onyń turaqty damýyna serpin beredi.
– Jalpy búginde Qazaqstannyń barlyq óńirinde eriktilik qozǵalysy qarqyndy damyp keledi. Eger 2020 jyly elde 224 volonterlik uıym jumys istese, 2025 jylǵa qaraı olardyń sany 800-den asty. Belsendi eriktilerdiń qatary 300 myńnan asyp, óńirlerde 3,5 myńǵa jýyq bastamashyl top jumys isteıdi, - dedi Aıbek Dosymbekov.
Qazirgi tańda volonterler áleýmettik qoldaý, ekologııa, densaýlyq saqtaý, bilim berý, týrızm jáne tótenshe jaǵdaılardyń saldaryn joıý baǵyttarynda qyzmet atqaryp keledi. Sonymen qatar Ulttyq volonterlik jeli jyl saıyn 60 myńnan astam eriktini biriktirip, Mádenıet jáne aqparat mınıstrliginiń strategııalyq seriktesi retinde jumys istep jatyr.
Aıta keteıik, jýyrda Pavlodarda volonterlik qozǵalysqa arnalǵan halyqaralyq forým ótti. Oǵan Ózbekstan, Qyrǵyzstan, Belarýs jáne Ázerbaıjan memleketterinen, sondaı-aq Astana qalasy men Qaraǵandy, Aqmola, Shyǵys Qazaqstan, Abaı, Pavlodar oblystarynan ókilder arnaıy qatysty.
