Elimizde volonterlerdiń qatary artyp keledi
ASTANA. KAZINFORM — Qazaqstanda volonterlik qozǵalys qarqyndy damýda. 2024–2026 jyldarǵa arnalǵan Volonterlikti damytý jáne qoldaý jónindegi jol kartasy aıasynda Ulttyq jáne 20 óńirlik front-keńse júıeli jumys júrgizip jatyr.
2025 jyldyń alǵashqy jartyjyldyǵynda elimizde volonterlerdiń qatysýymen 27 myńnan asa is-shara uıymdastyryldy. Bul — ótken jylmen salystyrǵanda birneshe ese joǵary nátıje.
Naýryz aıynda bastaý alǵan «Jaqsylyq jasa» marafony búkil el aýmaǵynda jalǵasýda. Osy ýaqyt ishinde áleýmettik, ekologııalyq jáne mádenı baǵyttardy qamtyǵan 1600-den astam ıgi is atqaryldy.
Memleket basshysy Qasym-Jomart Toqaevtyń tapsyrmasyna sáıkes, TMD elderi volonterleriniń forýmyn ótkizýge arnalǵan halyqaralyq ereje ázirlenip, ereje negizinde jyl saıynǵy Volonterler forýmy quryldy. Sonymen qatar, Qazaqstan 2026 jyly ótetin Halyqaralyq volonterler jylyna qyzý daıyndyq ústinde. Jyl basynan beri elimizdiń túrli aımaqtarynda 10 maqsatty toptyń kezdesýi ótti. Eki qazaqstandyq volonter halyqaralyq hatshylyqtarǵa, Túrkııa men Taılandqa jiberildi.
— Volonterler qarttar jáne balalar úılerinde kómek kórsetip, qutqarý jumystarynan bastap oqytý jobalaryna deıin túrli salada belsendilik tanytýda. Sonymen birge, tótenshe jaǵdaılardyń aldyn alý men qaýipsizdik baǵytynda aqparattyq jumystar júrgizýde. Barlyq óńirde 63 jastan asqan azamattarǵa arnalǵan «Belsendi uzaq ómir súrý» ortalyǵy jemisti jumys istep jatyr. Olar áleýmettik, bilim berý, ekologııalyq jáne mádenı jobalarǵa belsene atsalysyp jatyr, — delingen Mádenıet jáne aqparat mınıstrligi habarlamasynda.
Quqyqtyq volonterlik te damyp keledi. Búginde elimizde 3,5 myńnan astam zańger, advokat, notarıýs pen zań fakýltetteriniń stýdentteri halyqqa tegin quqyqtyq kómek kórsetip otyr. Jyl basynan beri 9 myńnan astam azamat keńes alǵan.
Volonterlik qyzmet Qazvolunteer.kz onlaın-platformasy arqyly úılestiriledi. Qazir bul platformada 3,7 myńnan astam uıym men 1,2 myńǵa jýyq joba tirkelgen.
Qazaqstanda volonterlik bastamalar kóbeıip keledi. Jaqsylyq jasaýǵa umtylǵan, qoǵamǵa paıdasyn tıgizýdi maqsat etken belsendi azamattar da jyl sanap artyp keledi.
Aıta ketelik volonter bolý adamnyń bolmysyn qalaı ózgertetini týraly jazǵan edik.