Elimizde volonterler sany 300 myńnan asty
ASTANA. KAZINFORM — Qazaqstandyq jastar qoǵamdyq jáne volonterlik bastamalarǵa belsendi aralasyp júr. Búginde eldegi volonterler sany 300 myńnan asqan. Bul týraly Mádenıet jáne aqparat vıtse-mınıstri Evgenıı Kochetov Halyqaralyq jastar kúnine arnalǵan brıfıngte málimdedi.
Vıtse-mınıstr volonterlik qozǵalys eldegi qoǵamdyq bastamalardyń mańyzdy bóligine aınalǵanyn atap ótti. Qazir eriktiler ekologııalyq jáne áleýmettik jobalarǵa atsalysyp júr.
— Búginde elimizde júzdegen jastar uıymy jumys isteıdi, volonterler sany 300 myńnan asady. Jastar, ásirese «Taza Qazaqstan» bastamasyna belsendi atsalysyp jatyr. Munda otansúıgishtik jaı sózben emes, óz aýlasyna, kóshesine, qalasy men eline degen jaýapkershilikten kórinedi, — dedi spıker.
Onyń, jastar arasynda «Taza Qazaqstan», «Zań men tártip» jáne «Adal azamat» qundylyqtaryn dáripteýge, sondaı-aq jumysshy mamandyqtarynyń bedelin arttyrýǵa basymdyq berilgen.
— «Taza Qazaqstan» aıasynda 1 mıllıonǵa jýyq adamnyń qatysýymen 7 myńǵa jýyq is-shara uıymdastyryldy. Al jumysshy mamandyqtaryn nasıhattaýǵa baǵyttalǵan 8,4 myń is-sharaǵa 1 mıllıonnan astam adam qatysty, — Evgenıı Kochetov.
Sondaı-aq «Adal azamat» qundylyqtaryn dáripteý aıasynda 166 myńnan astam jastyń qatysýymen 3,5 myń is-shara uıymdastyrylǵan.
Aıta keteıik, buǵan deıin Astanada volonterlik qozǵalysty qoldaýǵa baǵyttalǵan birqatar jańa joba júzege asyrylatyny jóninde habarlandy. Sonyń aıasynda elordada alǵash ret Volonterler saıabaǵyn ashý josparlanyp otyr.
