Elimizde velosıped pen samokatty jalǵa alý quny qansha
ASTANA. KAZINFORM – Kóktem týǵan kezde iri megapolıster men oblys ortalyqtarynda adamdar jeńil ári ekologııalyq taza kólikti qoldanady. Kazinform agenttiginiń tilshisi elimizde velosıped pen samokatty jalǵa alý quny qansha ekenin anyqtady.
Qazirgi kezde suranysqa ıe ári demalysqa yńǵaıly kólik quraly – velosıped. Bul salada qyzmet usynýshylar bir saǵatqa nemese bir kúnge jalǵa berýdi jón kóredi. Keıbir qalada «shaıtan arbaǵa» jıi minetin adamdar úshin arnaıy abonemet shyǵardy.
Elektrsamokattyń jaıy bólek. Keıbir qalada kóliktiń bul túrine qyzmet kórsetýshiler jumysyn ýaqytsha toqtatyp qoıǵan. Degenmen elimizdiń basym bóliginde aqyldy turaqtar qyzmetin jalǵastyryp jatyr. Sonymen birge qazir jazǵy demalys oryndarynda, saıabaqtarda, adam kóp shoǵyrlatanatyn oryndarda, jaǵalaýlarda samokatty jalǵa berý qyzmeti bar. Baǵa baǵamdaý kezinde bir saǵatqa jalǵa berý quny saralandy.
Velosıped
Eki aıaqty kólik quralyn jalǵa alý qyzmeti Qaraǵandy men Jezqazǵanda qymbat. Bul qalalarda bir saǵattyq serýen quny 3 000 jáne 6 000 teńge bolyp tur. Al Ulytaý oblysynda baǵa sál tómen.
Astana men Aqtóbe qalalarynda «shaıtan arbamen» bir saǵat júrseńiz 3 000 teńge tóleýge týra keledi. Elimizdiń astanasynda baǵa odan da joǵary bolýy múmkin. Soǵan qaramastan 2 000 – 4 000 teńgeniń usynystaryn da tabýǵa bolady.
Qostanaı qalasynda tarıf ekige bólinedi. Qarapaıym samokatty jalǵa alý saǵatyna 2 300 tg bolsa, joǵary jyldamdyqpen qozǵalatyn kólik quraly 3 000 teńgeden bastalady. Al balalarǵa arnalǵan tarıf – 1 500 – 1 800 teńge aralyǵynda.
Almaty qalasynda baǵa – 3 000 teńge. Týrıster kóp shoǵyrlanǵan oryndarda jalǵa alý quny odan joǵary. Shymkent qalasynda jalǵa berý quny 1 000 teńgeden bastalyp, 3 000 teńgege deıin (samokat túrine baılanysty) jetedi. Balalarǵa arnalǵan tarıf quny eki ese arzan. Jergilikti turǵyndar qatynas quralynyń shyǵynyn azaıtý úshin 4 saǵatty tańdaıdy. Baǵasy 5 000 – 6 000 teńge.
Pavlodar qalasyndaǵy saıabaqtyń jaǵalaýynda velosıped tebý quny eresekterge 2 000 teńgeden, balalarǵa 1 500 teńgeden bastalady. Eki adamǵa arnalǵan, onyń ishinde balalarǵa arnalǵan oryndyǵy bar «shaıtan arbany» jalǵa alý quny saǵatyna – 2 500 teńge.
Taldyqorǵan qalasynda jalǵa alý quny – 1 300 – 2 700 teńge aralyǵynda. Taraz qalasyndaǵy ortasha baǵa saǵatyna – 2 000 teńge.
Túrkistan men Qonaev qalalarynda velosıpedpen bir saǵat serýendeıtin eresketer saǵatyna 1 750 teńge tóleıdi. Óskemen, Qyzylorda, Oral men Semeıde baǵa shamamen – 1 500 teńge. Kókshetaý qalasynda da baǵa osy shamada. Sonymen birge jergilikti turǵyndar 10 000 teńge tólep, velosıpedti táýligine jalǵa ala alady.
Eń tıimdi baǵa Petropavl men Atyraý qalalarynda. Munda jalǵa alý quny 1 000 teńgeden bastalady. Al Aqtaý qalasynda velosıpedti jalǵa berý qyzmeti tabylmady.
Elektrsamokat
Elektrsamokatqa qatysty jaǵdaı múlde ózge. Kóp qalada kıksherıng jumys istep tur. Kóshelerde aqyldy turaqtar bar, samokatty iske qosý úshin uıaly telefondy qolǵa alyp, QR-kodty skanerden ótkizý jetkilikti. Samokatty iske qosýǵa, keıde saqtandyrýǵa aqy alady. Sonymen birge ár mınýtyna aqsha tóleýge týraly keledi. Shyǵyndy naqty anyqtaý úshin bir saǵatqa arnalǵan tarıfti salystyrdyq. Qosymsha arqyly jáne qarapaıym jalǵa berý qyzmetteri týraly da bildik.
Eń joǵary baǵa Shymkent qalasynda tirkeldi. Operatoryna qaraı bastapqy baǵa 200-300 teńge bolsa, ári qaraı ár mınýty – 55-75 teńge. Nátıjesinde saǵatyna adamdar 4 150 teńge jumsaıdy. Almaty men Astana qalalarynda da baǵa osy qaraılas. Munda samokatty iske qosý baǵasy tómen, soǵan saı saǵatyna esepteletin shyǵan azaıyp, 3 895 jáne 4 100 teńgeni qurady.
Kókshetaý qalasynda samokatty iske qosý 100 teńge, saqtandyrý quny 50 jáne ár mınýtyna 60 teńge esepteledi. Sonda saǵatyna 3 750 teńge shyǵady. Samokatqa jıi minetin qala turǵyndary arnaıy toptamany satyp alady. Máselen 100 mınýty 4 500 teńge bolady.
Taraz qalasynda qosymshany paıdalatyn tutynýshylar saǵatyna 3 430 teńge tóleıdi. Al kásipkerden tikeleı alsa jalǵa alý quny 4 000 teńge bolady.
Qaraǵandy qalasyndaǵy operatorlar túrli qyzmetti usynady. Samokatty iske qosý 150 – 300 teńge bolsa, ári qaraı ár mınýty 40 – 60 teńgege eseptelgen.
Taldyqorǵan, Qonaev pen Semeıde ár saǵatyna 3 150 teńge bolady. Aqtaý qalasynda samokatty iske qosý 100 teńge, al ár mınýty 49 teńge bolyp tur.
Qostanaı, Túrkistan men Jezqazǵanda tarıf quny saǵatyna – 2 645 – 2 740 teńge.
Pavlodar men Qyzylordada qatynas quralyn jalǵa alý quny – 2 500 teńge. Ońtústikte kóbine kıksherıng bolsa, soltústik, sonyń ishinde Pavlodar qalasynda qyzmettiń bul túri joq. Esesine kásipkerler samokatty saǵatyna jalǵa beredi.
Oral qalasynda elektrsamokat qyzmeti – 2 400 teńge, Óskemende – 2 100 teńge. Velosıped elimizdiń barlyq derlik qalasynda bolǵanymen, samokat qyzmeti Aqtóbe, Atyraý, Petropavlda joq.
Buǵan deıin elimizdegi fıtnes klýbtardyń abonemet baǵasy týraly jazyldy.
Sonymen birge tabıǵat aıasynda tynyǵý shyǵyny esepteldi.
