Elimizde vaktsına saldyrýdan bas tartqandar kóbeıdi me

ASTANA. KAZINFORM – 2024 jyly elimizde 20,6 myń adam vaktsına saldyrýdan bas tartty. Bul týraly Densaýlyq saqtaý mınıstrliginen málim etti.

- Ókinishke qaraı, búkil álemde de, elde de vaktsınatsııadan bas tartýdyń ósý tendentsııasy baıqalyp otyr. Bul ımmýndalmaǵan adamdar tobynyń kóbeıýine jáne vaktsınatsııalanbaǵan adamdar arasynda aýrýdyń órshýine yqpal etedi. Elimizde 2024 jyly vaktsınatsııalaýǵa jatatyn adamdardyń ishinen 20 679 adam profılaktıkalyq ekpe saldyrmaǵan. Al bıylǵy birinshi toqsanda 7 219 adam ekpeden bas tartty, - delingen QR DSM Sanıtarııalyq-epıdemıologııalyq baqylaý komıteti aqparatynda

Vedomstvo málimetine qaraǵanda, mınıstrlik turaqty negizde halyq arasynda vaktsınamen basqarylatyn ınfektsııalardyń aldyn alýda vaktsınoprofılaktıkanyń mańyzdylyǵy boıynsha túsindirip keledi. Halyqpen aqparattyq jumys júrgizý úshin qoǵam qaıratkerleri men medıa tulǵalar tartylyp jatyr.

- Mınıstrlik pen aýmaqtyq densaýlyq saqtaý júıesiniń turaqty negizde vaktsına salýdyń tıimdiligi boıynsha aqparattyq-túsindirý jumystaryn júrgizýdiń nátıjesinde, 2024 jyly bas tartqandar arasynan 8 058 (38,9%) adamǵa ekpe qoıyldy, - dep atalyp ótken komıtet habarlamasynda.

Eske salsaq, bıyl sáýir aıynda elimizde jetkinshek qyzdar arasynda jatyr moıny obyrynyń negizgi qozdyrǵyshy, ıaǵnı adam papılloma vırýsyna (APV) qarsy ekpe egýdiń ekinshi kezeńi bastaldy.