Elimizde úı janýarlaryn ustaý erejeleri ózgerdi
ASTANA. KAZINFORM — QR Ekologııa jáne tabıǵı resýrstar mınıstri mindetin atqarýshynyń 2026 jylǵy 6 tamyzdaǵy buıryǵy boıynsha, úı janýarlaryn ustaý jáne serýendetý qaǵıdalary ózgerdi.
— Úı janýaryn odan ári ustaý múmkin bolmaǵan jaǵdaıda, úı janýarynyń ıesi nemese jaýapty tulǵa ony ári qaraı ornalastyrý sharalaryn qabyldaıdy. Onyń ishinde janýardy janýarlarǵa arnalǵan panajaıǵa, janýarlardy ýaqytsha ustaý pýnktine nemese ony ustaýǵa qajetti jaǵdaı jasaı alatyn jeke nemese zańdy tulǵalarǵa berýi múmkin, — delingen qujatta.
Eskeretin mańyzdy jaıt — úı janýarynan bas tartsa da, ıesi nemese jaýapty tulǵa oǵan qatysty mindetterinen bosatylmaıdy. Basqa adam asyrap alsa, nemese janýarlarǵa arnalǵan panajaıǵa jiberilse ǵana ıesinen atalǵan jaýapkershilik alynady.
Sonymen qatar, úı janýary ýaqytsha ustaý pýnktine berilse, ıesi nemese jaýapty tulǵa onyń ary qaraı qaıda jiberiletini anyqtalǵanǵa deıin kútip-baǵýǵa mindetti.
Buıryq 24 tamyzdan bastap qoldanysqa engiziledi.
Aıta keteıik, buǵan deıin elde janýarlardy qorǵaý talaptary kúsheıtiletinin jazǵanbyz.
