Elimizde ushaqtar kóbinese qandaı qustarmen soqtyǵysady
ASTANA. KAZINFORM – Qazaqstanda áýe kemeleri kóbinese shaǵalalarmen, qarǵa tuqymdasyna jatatyn qustarmen, kepterlermen jáne jyrtqysh qustarmen soqtyǵysady. Bul týraly Qazaqstannyń avıatsııalyq ákimshiligi Kazinform agenttiginiń resmı saýalyna bergen jaýabynda habarlady.
Vedomstvonyń málimetinshe, atalǵan qustar elimizdiń barlyq aýmaǵynda keńinen taralǵan. Olar tamaq, sý jáne tynyǵatyn jer izdep, áýejaılarǵa jaqyn aýmaqtarda jıi kezdesedi.
– Qustarmen soqtyǵysý jıiligi olardyń sanyna, jyl mezgiline jáne áýeaılaqtardyń qustar shoǵyrlanatyn oryndarǵa qanshalyqty jaqyn ornalasqanyna baılanysty. Ásirese kóktemgi jáne kúzgi kóshi-qon kezeńderinde qustardyń sany men qozǵalys qarqyndylyǵy artýy múmkin. Sonymen qatar jazda, balapandar paıda bolǵan kezde de soqtyǵysý qaýpi joǵarylaıdy, - delingen jaýapta.
Máselen, Nursultan Nazarbaev halyqaralyq áýejaıynyń málimetinshe, áýeaılaq aýmaǵynda jáne onyń mańynda kól shaǵalasy, kúmis shaǵala, qara jáne sur qarǵa, kók kepter, sur qutan, kúıkentaı, saz quladyny, saýysqan, qarlyǵash pen torǵaı kezdesedi.
Áýejaı mamandarynyń túsindirýinshe, iri deneli jáne toptalyp ushatyn qustar áýe kemelerine kóbirek qaýip tóndiredi. Qaýip deńgeıin baǵalaǵanda qustardyń kólemi ǵana emes, olardyń sany men ushaqtar qozǵalatyn aımaqtarǵa jaqyndyǵy da eskeriledi.
Al Avıatsııalyq ákimshilik mundaı qaýip táýliktiń qustar belsendi bolatyn jekelegen ýaqyttarynda da baıqalýy múmkin ekenin atap ótti. Sondyqtan ár áýejaıda jergilikti tabıǵı jaǵdaı men qustardyń qozǵalys erekshelikteri eskeriledi.
