Elimizde úsh týrıstik óńirde jańa áýejaı salynyp jatyr
ASTANA. KAZINFORM - Qazaqstanda Kendirli, Zaısan jáne Katonqaraǵaıda jańa áýejaılardyń qurylysy júrip jatyr. Bul týraly Týrızm ındýstrııasy komıteti Kazinform agenttiginiń resmı saýalyna bergen jaýabynda habarlady.
Komıtet tóraǵasynyń orynbasary Aıdyn Qapashevtyń aıtýynsha, bul jobalar shalǵaı týrıstik baǵyttarǵa qatynaýdy jeńildetip, ishki týrızmniń qoljetimdiligin arttyrýǵa baǵyttalǵan.
– Qazirgi tańda Kendirli, Zaısan jáne Katonqaraǵaıda jańa áýejaılar boı kóterip jatyr. Shalǵaı óńirlerge qatynaıtyn joldy edáýir jeńildetetin osy túıindi ınfraqurylym jobalaryn 2026 jyly aıaqtaý kózdelgen, - dedi spıker.
Onyń atap ótýinshe, ishki týrızmniń qoljetimdiligin arttyrý úshin birqatar júıeli shara iske asyrylyp jatyr. Sonyń biri – Kids Go Free baǵdarlamasy.
– Joba aıasynda otandyq týroperatorlardyń týrpaketterine kiretin 2–17 jas aralyǵyndaǵy balalardyń áýe bıletteri sýbsıdııalanady. Bul otbasylardyń el ishinde saıahattaý shyǵynyn azaıtýǵa múmkindik beredi, - dedi ol.
Sonymen qatar Mańǵystaý jáne Şýche-Býrabaı kýrorttyq aımaqtaryn, sondaı-aq Almaty taý klasterin damytýdyń keshendi josparlary bekitilgen. Bul jobalar týrıstik ınfraqurylymdy jańǵyrtýǵa, demalys oryndarynyń tartymdylyǵyn arttyrýǵa jáne óńirlerge kelýshiler sanyn kóbeıtýge baǵyttalǵan.
– Elimizdegi týrıstik baǵyttardyń suranysqa ıe bolýyna olardyń qoljetimdiligi de áser etedi. Atap aıtqanda, baǵyttardyń jaqyn ornalasýy, tildik kederginiń bolmaýy, bılet baǵasynyń salystyrmaly túrde qoljetimdi bolýy jáne qysqa merzimdi demalysty ońaı josparlaý múmkindigi azamattardyń el ishinde saıahattaýyna yqpal etip otyr, - dedi komıtet tóraǵasynyń orynbasary.
Buǵan qosa, emdik-saýyqtyrý, ekotýrızm, jaǵajaı, belsendi jáne oqıǵaly týrızm sııaqty týrıstik ónimderdiń san alýandyǵy demalysty túrli sanattaǵy týrısterdiń suranysyna saı uıymdastyrýǵa múmkindik beredi.
Aıta keteıik, Qazaqstan Úkimeti áýejaılarǵa, porttarǵa, temirjol vokzaldaryna, metro stantsııalaryna, avtovokzaldarǵa jáne memlekettik menshiktegi ózge de nysandarǵa ataý berý qaǵıdalaryna ózgeris engizgen edi.
