Elimizde úsh myńnan astam mektep avtobýsy tekserildi
ASTANA. KAZINFORM — Jazǵy demalys qarsańynda el aýmaǵynda balalardyń jol-kólik jaraqatynyń aldyn alýǵa jáne joldaǵy qaýipsiz minez-qulyq mádenıetin qalyptastyrýǵa baǵyttalǵan «Abaılańyz — balalar!» respýblıkalyq aktsııasy ótti, dep habarlaıdy Polisia.kz.
ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranovanyń sózinshe, atalǵan aktsııaǵa eki myńnan astam uıym men mekeme, onyń ishinde 500-ge jýyq úkimettik emes uıym jumyldyryldy.
— Balalardy tasymaldaý qaýipsizdigine erekshe nazar aýdaryldy. Kóliktik baqylaý organdarymen birlesip, úsh myńnan astam mektep avtobýsy tekserildi. Tekserý nátıjesinde 400-ge jýyq tehnıkalyq aqaýy bar kólik quraly anyqtalyp, anyqtalǵan kemshilikterdi joıý boıynsha 200-den astam nusqama berildi, — dedi ol.
Sondaı-aq jas jol ınspektorlarymen birlesip, jolda júrý qaǵıdalaryn nasıhattaýǵa baǵyttalǵan myńǵa jýyq profılaktıkalyq jáne úgit-nasıhat is-sharalary ótkizildi.
— Polıtsııa ata-analardy, júrgizýshilerdi jáne barlyq jol júrisine qatysýshylardy jazǵy demalys kezeńinde barynsha muqııat bolýǵa shaqyrady. Balalardyń qaýipsizdigi — árqaısymyzdyń jaýapkershiligimiz. Balalardy qorǵap, jolda júrý qaǵıdalaryn saqtaıyq! — dedi Aqtoty Boranova.
Buǵan deıin Astanada júk kóligi kámeletke tolmaǵan velosıped minip ketip bara jatqan balany qaǵyp ketkenin jazǵanbyz. Oqıǵa saldarynan bala kóz jumdy.
