Elimizdegi myńǵa jýyq dári úndi kompanııalarynda shyǵarylǵan
ASTANA. KAZINFORM — Qazaqstan men Úndistan densaýlyq saqtaý salasyndaǵy yntymaqtastyqty keńeıtip jatyr. Osyǵan oraı, Densaýlyq saqtaý mınıstri Aqmaral Álnazarova Úndistan Respýblıkasynyń QR Elshisi Saılas Tangalmen kezdesý ótkizdi, dep habarlaıdy vedomstvonyń baspasóz qyzmeti.
Ol Qazaqstan sońǵy jyldary bastapqy býyndy nyǵaıtýǵa, medıtsınalyq qyzmetterdi tsıfrlandyrýǵa jáne farmatsevtıka salasyn damytýǵa baǵyttalǵan aýqymdy reformalardy júzege asyryp jatqanyn atap ótti.
— Úndistan medıtsınalyq tehnologııalar, farmatsevtıkalyq óndiris, telemedıtsına jáne dástúrli medıtsına salasynda tanymal kóshbasshy. Úndistannyń turaqty, qoljetimdi jáne ınnovatsııalyq densaýlyq saqtaý júıesin damytý jónindegi tájirıbesi Qazaqstan úshin aıtarlyqtaı qyzyǵýshylyq týdyrady. Biz Úndistandy qoǵamdyq densaýlyqty nyǵaıtýǵa jáne adamı kapıtaldy damytýǵa umtylatyn senimdi jáne strategııalyq áriptes retinde qarastyramyz, — dep atap ótti vedomstvo basshysy.
Kelissózderdiń negizgi baǵyttarynyń biri farmatsevtıka salasyndaǵy yntymaqtastyq boldy.
Búgingi tańda Qazaqstanda úndi kompanııalary shyǵarǵan 965 dárilik zat pen 248 medıtsınalyq buıym tirkelgen. Mınıstr Qazaqstanda óndiristi oqshaýlaý jáne ózara is-qımyldyń naqty baǵyttaryn ázirleý úshin birlesken jumys tobyn qurý múmkindikterin qarastyrýdy usyndy.
Taraptar Úndistannyń tehnıkalyq jáne ekonomıkalyq yntymaqtastyq baǵdarlamasy (ITEC) sheńberinde kadrlyq áleýetti jáne bilim berý baǵdarlamalaryn damytýdy talqylady. Baǵdarlamaǵa qatysýdyń arqasynda qazaqstandyq mamandar jetekshi Úndi klınıkalary men ǵylymı mekemelerinde oqýdan jáne taǵylymdamadan ótedi.
Qazaqstanda DDU-men birlesip qalyptastyrylatyn Medıtsınalyq-sanıtarııalyq alǵashqy kómek jónindegi elder koalıtsııasynyń Hatshylyǵyn qurýǵa erekshe nazar aýdaryldy. Aqmaral Álnazarova úndilik tarapty Hatshylyqtyń qyzmetine belsendi qatysýǵa jáne saraptamalyq jáne qarjylyq qoldaý múmkindigin qarastyrýǵa shaqyrdy.
Kezdesý barysynda aıýrved jáne dástúrli medıtsına salasyndaǵy yntymaqtastyqtyń mańyzdylyǵy atap ótildi. Qazaqstan Respýblıkasy Densaýlyq saqtaý mınıstrligi men Úndistan Respýblıkasynyń AYUSH mınıstrliginiń arasyndaǵy ózara túsinistik týraly memorandým jobasyn kelisý rásimderi aıaqtaldy. Qujat mamandarmen almasýdy, birlesken zertteýler júrgizýdi jáne bilim berý baǵdarlamalaryn iske asyrýdy kózdeıdi.
— Dástúrli medıtsına boıynsha memorandýmǵa qol qoıý elder arasyndaǵy gýmanıtarlyq jáne ǵylymı baılanystardy nyǵaıtýdaǵy mańyzdy qadam bolady, — dep atap ótti Densaýlyq saqtaý mınıstri.
Aqmaral Álnazarova ótken kezdesý densaýlyq saqtaý salasyndaǵy Qazaqstan-Úndistannyń ózara is-qımylynyń damýyna jańa serpin beretinine jáne eki el halyqtarynyń densaýlyǵy men ál-aýqaty múddesinde áriptestikti odan ári keńeıtý úshin negiz bolatynyna senim bildirdi.
Eske salaıyq, mınıstr Aqmaral Álnazarova MÁMS júıesiniń basty nátıjelerin atady.