Elimizde ulttyq joba sheńberinde 655 densaýlyq saqtaý nysanynyń qurylysy aıaqtaldy
ASTANA. KAZINFORM – Qazaqstanda «Aýyldyq densaýlyq saqtaýdy jańǵyrtý» ulttyq jobasy sheńberinde josparlanǵan 655 medıtsınalyq-sanıtarııalyq alǵashqy kómek nysanynyń qurylysy aıaqtaldy. Bul týraly Densaýlyq saqtaý mınıstrliginiń baspasóz qyzmeti habarlady.
Ulttyq joba Memleket basshysynyń tapsyrmasy boıynsha iske asyrylady jáne úsh negizgi mindetti kózdeıdi: aýyldyq eldi mekenderde MSAK uıymdarynyń jelisin damytý, shuǵyl medıtsınalyq kómek kórsetýdi ýaqtyly qamtamasyz etý jáne aýyldyq medıtsınalyq uıymdardy kadrlarmen jasaqtaý.
2023-2025 jyldarǵa arnalǵan birinshi mindet sheńberinde medıtsınalyq pýnktterdi, feldsherlik-akýsherlik pýnktterdi jáne dárigerlik ambýlatorııalardy qosa alǵanda, 655 MSAK nysanyn salý kózdelgen. Búgingi tańda barlyq nysandardyń qurylysy aıaqtaldy.
Jobany iske asyrý kezeńinde 2023 jyly 99 MSAK nysany, 2024 jyly 361 nysan jáne 2025 jyly 195 nysan salyndy. Jańa ǵımarattar eskirgen ınfraqurylymdy aýystyrýǵa, sondaı-aq densaýlyq saqtaýdyń bastapqy býyny buryn bolmaǵan eldi mekenderdi medıtsınalyq nysandarmen qamtamasyz etýge múmkindik berdi. Sonymen qatar ulttyq jobanyń ekinshi mindeti sheńberinde 32 aýdandyq aýrýhanany kópbeıindi aýdandyq ortalyq aýrýhanalar deńgeıine deıin jańǵyrtý kózdelgen. Nysandardyń bir bóligi boıynsha qurylys-montaj jumystary aıaqtaldy, qalǵandary boıynsha rekonstrýktsııalaý, qosymsha qurylystar salý jáne kúrdeli jóndeý jumystary júrgizilip jatyr.
Osylaısha, aýyldyq jerlerde medıtsınalyq-sanıtarııalyq alǵashqy kómek nysandarynyń jelisin qurý boıynsha «Aýyldyq densaýlyq saqtaýdy jańǵyrtý» ulttyq jobasynyń birinshi mindeti tolyq kólemde oryndaldy.
Eske sala keteıik, buǵan deıin Túrkistanda qaraýsyz qalǵan 70 nysan anyqtalǵanyn jazǵan edik.