Úkimet «Jaıly mektepterdi» qalaı basqarmaq

ASTANA. KAZINFORM - Memleket basshysy halyqqa Joldaýynda «Jaıly mektep» ulttyq jobasy aıasynda salynǵan mektepterdi basqarýdyń tıimdi júıesin qurýdy tapsyrdy, dep habarlaıdy Úkimettiń baspasóz qyzmeti.

Oqý-aǵartýmınıstrligi, bilim salasyndaǵy sarapshylardyń qatysýymen birqatar usynys ázirledi. Olar Úkimette uıymdastyrylǵan keńes kezinde talqylandy.

Oǵan QR Premer-mınıstriniń orynbasary Tamara Dúısenova, QR Prezıdentiniń ishki saıasat máseleler jáne kommýnıkatsııalar jónindegi kómekshisi Rýslan Jeldibaı, Oqý-aǵartý mınıstri Ǵanı Beısembaev, sondaı-aq bilim salasynyń sarapshylary men ókilderi qatysty.

Búginde elimizde ulttyq joba aıasynda salynǵan 28 mektep jumysyn bastady. Keler jyldyń sońyna deıin barlyǵy 217 nysan paıdalanýǵa beriledi dep josparlanǵan.

Salalyq mınıstrlik pen bilim berý salasynyń sarapshylary jaıly mektepterdi basqarýdyń birneshe modelin usyndy. Onda bilim oshaqtary jumysynyń mazmunyna basa mán berildi. Sondyqtan oqý baǵdarlamalary, oqytý ádistemeleri, bilim jáne ustazdar daıyndyǵynyń deńgeıin baǵalaýda Nazarbaev zııatkerlik mektepteri, Bilim-ınnovatsııa lıtseıleri, Respýblıkalyq fızıka-matematıka mektepteri, Bınom jelisi sekildi eldegi aldyńǵy qatarly keısterdi paıdalaný usynylýda.

Tamara Dúısenova aldaǵy ýaqytta jaıly mektepter óz múmkindikterin paıdalana otyryp, ózge orta bilim berý mekemelerine úzdik tájirıbelerdi taratýdaǵy tirek mektepter bolýy tıis ekenin atap ótti.

Rýslan Jeldibaı keńes barysynda aıtylǵan usynystar ońtaıly ári tıimdi sheshim qabyldaý úshin muqııat qarastyrylatynyn jetkizdi.

Osyǵan deıin Aqmola oblysyndaǵy eki aýylda Jaıly mektep ashylǵanyn jazdyq.