Elimizde Ulttyq mýzeı janynan Restavratsııa ortalyǵy qurylady

ASTANA. KAZINFORM — QR Mádenıet jáne aqparat mınıstri Aıda Balaeva Italııa Mádenıet mınıstrliginiń Restavratsııa jónindegi ortalyq ınstıtýtynyń dırektory Lýıdjı Olıvamen kezdesti. Taraptar Ulttyq mýzeıi men Italııa Respýblıkasynyń Restavratsııa jónindegi ortalyq ınstıtýty arasynda Memorandýmǵa qol qoıdy, dep habarlaıdy vedomstvonyń baspasóz qyzmeti.

Qujatqa sáıkes, QR Ulttyq mýzeı janynan Restavratsııa ortalyǵy qurylady. Jańa mekeme tájirıbe almasý, birlesken semınarlar ótkizý jáne bilikti mamandar daıarlaý ortalyǵy bolmaq.

— Bul baǵyttaǵy ınstıtýtsıonaldyq negiz qurý — strategııalyq másele. Qazaqstan men Italııa arasyndaǵy qarym-qatynas qarqyndy damyp keledi. Eki el basshylarynyń kezdesýleri, ózara qoldaýy jáne barlyq baǵyttarda — ekonomıkalyq, syrtqy saıası, mádenı-gýmanıtarlyq yntymaqtastyqty nyǵaıtýy sonyń dáleli. Osyndaı mádenı baılanystar bizdiń halyqtardyń birin-biri tereńirek tanýyna yqpal etedi, — dedi Aıda Balaeva.

Mınıstrdiń aıtýynsha, ıtalııalyq mamandardyń tájirıbesi mýzeı isin, restavratsııa qyzmetin jáne ulttyq murany saqtaý isin damytýǵa sep bolady.

— Restavratsııa ortalyǵynyń jemisti jumys isteýi — joǵary deńgeıdegi mamandardyń eńbegine baılanysty. Biz metall, tas, mata, aǵash jáne basqa da materıaldardan jasalǵan kórkem jáne tarıhı-mádenı qundylyqtardy qalpyna keltirýmen aınalysatyn kásibı kadrlar tobyn daıarlaýǵa atsalysqymyz keledi. Bul óte mańyzdy, sebebi Ulttyq restavratsııa ortalyǵyn qurý arqyly biz jańa býyn mamandardy daıarlaıtyn aımaqtyq ortalyqtardy da qalyptastyramyz. Sondaı-aq, osy jumystyń áleýmettik jáne qaıyrymdylyq tusyn da eskerý mańyzdy. Eger daıarlyq baǵdarlamasyna múmkindigi shekteýli jastardy tartyp, olarǵa restavrator mamandyǵyn ıgerýge jáne suranystaǵy kásibı maman retinde damýyna múmkindik bersek, óte jaqsy bolar edi dep esepteımin, — dedi mınıstr.

Lýıdjı Olıva óz tarapynan yntymaqtastyqqa daıyn ekenin bildirdi.

— Qazaqstanda Ulttyq restavratsııa ortalyǵyn qurý — bul tek mádenı joba emes, sonymen qatar jańa jumys oryndaryn ashýǵa múmkindik. Ortalyqtyń qyzmeti metall, aǵash, mata, tas jáne basqa da materıaldardan jasalǵan buıymdardy qalpyna keltirý baǵyttaryn qamtıdy. Biz qazaqstandyq restavratorlardy oqytýǵa jáne mýzeı eksponattarymen jumys isteýdiń ozyq tehnologııalaryn engizýge daıynbyz, — dedi Italııa Mádenıet mınıstrliginiń Restavratsııa jónindegi ortalyq ınstıtýtynyń dırektory Lýıdjı Olıva.

Kezdesý barysynda Aıda Balaeva Astanada ótken Leonardo da Vınchıdiń «Ádemi hanshaıym» kartınasynyń kórmesi týraly da atap ótti. Bul kórme qazaqstandyq kórermenniń qyzyǵýshylyǵyn týdyrdy. Mınıstr ıtalııalyq tarap osy baǵyttaǵy yntymaqtastyqty jalǵastyryp, Italııa sýretshileriniń basqa da týyndylarynyń kórmesin ótkizýge qoldaý bildirýge daıyn ekenin jetkizdi.

Kezdesý sońynda taraptar ózara yntymaqtastyq Qazaqstan men Italııa arasyndaǵy dostyqty nyǵaıtýǵa mańyzdy úles qosatynyna senim bildirdi.

Buǵan deıin Ulttyq mýzeıde jańa etnografııa zaly ashyldy.