Elimizde ulttyq kıim baǵasy qansha
ASTANA. KAZINFORM - Qazaqtyń ulttyq kıiminiń baǵasy elimizdiń óńirlerinde ártúrli. Bazarda satylatyn kıim birinde arzan, al ekinshisinde qymbat bolyp tur. Onyń ishinde eksklıýzıvti kıimniń quny joǵary, dep habarlaıdy Kazinform agenttiginiń tilshisi.
Kóktem týa adamdar merekelik kóńil-kúıge bólenip, ulttyq kıimge suranys artady. Sonymen birge keıingi kezderi kópshiliktiń ulttyq kıimge degen qyzyǵýshylyǵy eselendi. Elimizdiń óńirlerinde baǵa ártúrli. Taldaý úshin shapan, qamzol jáne taqııany tańdap, dızaınerdiń qolynan shyqqan úlginiń de baǵasyn bildik.
Erler shapany
Er adamdarǵa arnalǵan oıýly qysqa shapan qazir ár úıden tabylady. Elimizdiń óńirlerinde onyń baǵasy ártúrli. Er arzany Aqtóbe men Shymkent qalalarynda satylady. Munda baǵa - 7 000 - 8 000 teńge, al Qyzylordada 5 500 teńge bolyp tur.
Jalpy el boıynsha shapan baǵasy orta eseppen 15 000–80 000 teńge aralyǵynda. Mundaı baǵany Qaraǵandy, Pavlodar, Kókshetaý jáne Túrkistan qalalarynan tabýǵa bolady.
Eń joǵary baǵa Aqtaý qalasynda. Munda shapandy 250 000 teńgege satyp alýǵa bolady. Semeıde 200 000 teńge, sondaı-aq Almaty men Jezqazǵanda 180 000 teńgege deıingi baǵany usynady. Óskemende baǵa 170 000 teńgege deıin jetti.
Áıelder qamzoly
Áıelder qamzolyna tańdaý kóp. Matanyń sapasy men dızaıner úlgisine qaraı quny ózgerip otyrady. Oıýly kesteni ózi tikese baǵasy da joǵary bolady.
Aqtóbede 7 000 teńgeden, Túrkistanda 5 000 teńgeden bastalady. Bul elimiz boıynsha eń tómen baǵa. Kóptegen óńirlerde eń tómengi baǵa 8 000–20 000 teńge aralyǵynda.
Ortasha baǵa - 20 000–60 000 teńge. Bul baǵa Oral, Petropavl, Taraz jáne Taldyqorǵan qalalarynda tirkeldi.
Eń qymbat qamzol Semeı men Qaraǵandyda satylyp jatyr. Baǵa 200 000 teńgege deıin jetedi. Sonymen qatar Astana, Almaty jáne Óskemen qalalarynda baǵa 150 000 teńgege deıin barady.
Taqııa baǵasy
Ulttyq kıimderdiń basqa túrine qaraǵanda taqııa baǵasy qoljetimdi. Degenmen munda da óńirlik aıyrmashylyq bar.
Eń tómen baǵa Aqtóbede. Baǵasy - 500 teńge. Kókshetaýda shamamen 1 500 teńgeden, al Shymkent pen Qyzylordada 1 500–2 000 teńgeden bastalady.
El boıynsha ortasha baǵa 2 000–10 000 teńge aralyǵynda. Atyraý, Pavlodar jáne Taraz qalalarynda dál osy baǵada satylady.
Eń joǵary baǵa 15 000 teńgege deıin jetedi. Astana, Almaty, Qaraǵandy jáne Jezqazǵan qalalarynda baǵa osyndaı.
Jalpy qorytyndy
Qazaqstanda ulttyq kıimge tańdaý joǵary. Sapasyna saı quny da ózgerip otyrady. Baǵaǵa turǵyndardyń tabysy, týrısterdiń suranysy da áser etedi. Dızaınerlerdiń usynysy men sheberlerdiń qolynan shyqqan buıym da qazir baǵaǵa áser etedi.
Bazardaǵy baǵa kópshilikke qoljetimdi, al sheber qolynan shyqqan kıim baǵasy150 000–200 000 teńge jáne odan joǵary.
Buǵan deıin Kazinform agenttigi ulttyq táttilerdiń baǵa ındeksin jarııalaǵan bolatyn.