Elimizde ÝEFA standarty boıynsha salynǵan úshinshi stadıon ashyldy
ASTANA. KAZINFORM — Erbol Myrzabosynov Qyzylorda qalasynda 11 myń oryndyq kópsalaly stadıonnyń saltanatty ashylýyna qatysty. Bul týraly Týrızm jáne sport mınıstrligi málim etti.
Іs-sharaǵa sondaı-aq Qazaqstan fýtbol federatsııasynyń prezıdenti Marat Omarov pen Qyzylorda oblysynyń ákimi Nurlybek Nálibaev qatysty. Sport nysanynyń jalpy aýmaǵy 20 myń sharshy metrden asady. Keshende boks, kúres, sporttyq gımnastıka, taekvondo, aýyr atletıkaǵa arnalǵan zaldar bar. Sonymen qatar ortalyqta erekshe qajettiligi bar jandar úshin de qolaıly jaǵdaı qarastyrylǵan.
– Memleket basshysynyń tapsyrmasyna sáıkes elimizde sport ınfraqurylymyn damytý baǵytynda aýqymdy jumystar atqarylyp jatyr. Bıyl jyl basynan beri elimizdiń 14 óńirinde 32 sport nysany paıdalanýǵa berildi. Jyl sońyna deıin taǵy 70 nysannyń qurylysy aıaqtalady dep josparlanýda. «Qaısar Arena» stadıony – Qasym-Jomart Toqaevtyń tapsyrmasymen júzege asqan eń iri ınfraqurylymdyq jobalardyń biri. Bul keshen iri halyqaralyq jarystar men mádenı-sporttyq is-sharalardy ótkizýge múmkindik beredi, – dedi Erbol Myrzabosynov.
Stadıon ÝEFA-nyń 4-sanatyna tolyq sáıkes keledi. Fýtbol alańy zamanaýı jasandy kógalmen jabdyqtalyp, jaryqtandyrý júıesi de ÝEFA talaptaryna saı jasalǵan. Aıta keteıik, bıyl qyrkúıekte Túrkistan qalasynda Ortalyq Azııada teńdesi joq eskek esý arnasynyń qurylysy aıaqtaldy. Munda halyqaralyq deńgeıdegi jarystardy qabyldaýǵa tolyq múmkindik bar. Sondaı-aq jyl sońyna deıin sport kolledjinen bastap doktorantýraǵa deıin úzdiksiz bilim berý júıesin qamtamasyz etetin Ulttyq sport ýnıversıteti iske qosylady. Ýnıversıtet ınfraqurylymyna stadıon, jabyq jeńil atletıka maneji, olımpıadalyq basseın, sport kesheni, ǵylymı-zertteý jáne medıtsınalyq-ońaltý ortalyqtary kiredi. El astanasynda Q. Muńaıtpasov atyndaǵy jańa stadıon salynyp jatyr.
Sport nysany 2026 jyly paıdalanýǵa beriledi. Keshen jyl boıy oqý-jattyǵý jumystaryna arnalǵan. 2024 jylǵy derekterge sáıkes, elimizde halyqtyń 40%-dan astamy turaqty túrde sportpen shuǵyldanady. Halyqtyń sport ınfraqurylymymen qamtylý deńgeıi (ár 1000 adamǵa shaqqanda) 55%-dan asqan. Aldaǵy jyldary otandastarymyzdyń salamatty ómir saltyna qyzyǵýshylyǵyn jáne zamanaýı sport nysandaryna suranysyn eskere otyryp, bul kórsetkishti 2029 jylǵa qaraı 65%-ǵa jetkizý josparlanyp otyr.
Aıta keteıik, Týrızm jáne sport mınıstrliginiń fýtbol klýbtaryndaǵy legıonerlerdi qysqartýǵa shamasy jetpeı otyr.