Elimizde ýaqtyly jańartylmaǵan bazar ıelerine aıyppul salynady
ASTANA. KAZINFORM – Keler jyldan bastap bazardy jańartýǵa qatysty usynym men eskertýlerdi elemegen bazar ıelerine aıyppul salyna bastaıdy. Bul týraly Saýda jáne ıntegratsııa mınıstrligi saýda komıtetiniń tóraǵasy Aıdar Ábildabekov málim etti.
- Bazarlardy jańǵyrtý jumysy aldymen bıznestiń áleýmettik jaýapkershiligi ekenin eskerý qajet. Jańartý tek satyp alýshylar úshin ǵana emes, satýshylar úshin de qolaıly jáne qaýipsiz jaǵdaı jasaıdy. Jergilikti ákimdikter men aýmaqtyq saýda departamentteri jańǵyrtýdy ýaqtyly ári sapaly júrgizý jáne jańǵyrtýǵa kedergi keltiretin problemalardy joıý boıynsha jumysty kúsheıtýi qajet, - dedi Aıdar Ábildabekov Ortalyq kommýnıkatsııalar qyzmeti alańynda ótken baspasóz máslıhatynda.
Osy oraıda Saýda komıtetiniń basshysy bazar ıelerine jaýapkershilik júkteletinin aıtty.
- 2026 jylǵy 1 qańtardan bastap ákimshilik quqyq buzýshylyq týraly zańnamaǵa sáıkes, bazardy belgilengen merzimde jańǵyrtýdy qamtamasyz etpegen saýda bazarlarynyń ıelerin ákimshilik jaýapkershilikke tartý josparlanyp otyr, - deıdi ol.
Sondaı-aq, spıker aldymen bazar ıelerine eskertý jasalyp, usynym beriletinin aıtty, eger eskertý elenbegen jaǵdaıda 300 AEK ( 1 179 600 teńge) kóleminde aıyppul salynady. Másele aıyppulmen sheshilmegen jaǵdaıda is sotqa jiberiledi.
Aıta keteıik, bıyl elimizde 100 bazar jańartylady. Aldymen Saýda jáne ıntegratsııa mınıstrliginiń ókilderi barlyq bazardy aralap, tekserip shyǵady.
Eske sala ketsek, jyl basynda Úkimet basshysy búkil saýda qyzmetin, onyń ishinde bazarlar men úı mańyndaǵy shaǵyn dúkenderdiń qyzmetin tsıfrlandyrý boıynsha naqty usynystar men sharalar ázirleý kerektigin aıtqan edi.