Elimizde tutynýshylar quqyǵyn qorǵaý ombýdsmeni ınstıtýty qurylady

ASTANA.KAZINFORM — Tutynýshylardyń quqyǵyn qorǵaý salasynda ombýdsmen ınstıtýty qurylady.

Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

— Jańa zań qabyldanǵan soń Ombýdsmen ınstıtýty qurylady. Máselen, bıznes salasynda biraz ýaqyttan beri Bıznes ombýdsmen ınstıtýty jumys isteıdi. Qazaqstannyń 20 mln halqy da tutynýshy bolyp sanalady. Ázirge ondaı ınstıtýt joq, ol ınstıtýt zań qabyldanǵan soń bolady. Ombýdsmendi Úkimet taǵaıyndaıdy, ıaǵnı ol joǵarǵy deńgeıde taǵaıyndalatyn bolady, — dedi ol.

Sondaı-aq, komıtet tóraǵasynyń orynbasary ótken jyly tutynýshylar qaı salalardaǵy qyzmetke kóp shaǵymdanǵanyn aıtty. 

— 2024 jyl boıynsha 60 myńnan astam shaǵym tústi. 2023 jyly 50 myńnan astam shaǵym boldy, ıaǵnı shaǵym sany 12 myńǵa jýyq ósken. Onyń 35 paıyzy — bólshek saýdaǵa, 23 paıyzy — elektrondyq saýdaǵa, 8 paıyzdan astamy turǵyn-úı kommýnaldyq sharýashylyǵyna, 5 paıyzy — baılanys qyzmetterine, qalǵany kólik, medıtsına, týrıstik qyzmetterge qatysty. Ótken jyly sottarda óz kúshimen tutynýshylar 2 mlrd-tan astam teńgege quqyqtaryn qalpyna keltirgen. Onyń ishine materıaldyq jáne moraldyq shyǵyndar kiredi, — dedi Serik Qusaıynov.

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda.

Buǵan deıin tutynýshylar jańa zań qabyldanǵan soń 4 satyly shaǵymdaný kezeńderinen ótpesten, birden sotqa júgine alý múmkindigi engiziletini jaıly jazǵan edik.