Elimizde túrmeden shyqqandardyń qaıta qylmys jasamaýy úshin qandaı sharalar qabyldanyp jatyr
ASTANA. KAZINFORM – QR Іshki ister mınıstrligi Qylmystyq atqarý júıesi komıteti resmı saýalymyzǵa joldaǵan jaýabynda jýyrda amnıstııaǵa ilikkender jaıly statıstıkany bólisti. Sondaı-aq, bostandyqqa shyqqan soń, olardyń qaıta qylmys jasamaýy úshin qandaı múmkindikter beriletinin málimdedi.
– «QR jańa Konstıtýtsııasynyń qabyldanýyna baılanysty raqymshylyq jasaý týraly» QR Zańyn iske asyrý máselesi Іshki ister mınıstrligi men Qylmystyq-atqarý júıesi komıtetiniń turaqty baqylaýynda. Búgingi tańda sottar myńnan astam materıaldy qarady. Nátıjesinde, qylmystyq-atqarý júıesi mekemelerinen 970 adam bosatyldy. Bostandyqqa shyqqannan keıin olarǵa ákimshilik qadaǵalaý belgilenedi, – delingen habarlamada.
Sonymen qatar, probatsııa qyzmetiniń esebinde turǵan taǵy 947 azamat jazasyn odan ári óteýden bosatyldy. Budan bólek, abaqtylardaǵy 1000-nan astam sottalǵan adamnyń jazalaý merzimi qysqartyldy.
Jazasyn óteýshiler erkindikke shyqqanan keıin, olardy qoǵamǵa beıimdeý tetikteri de qarastyrylǵan.
– 2025 jyly Qylmystyq kodekstiń 44-babyna ózgerister engizilip, probatsııalyq baqylaýda turǵan adamdardyń mindetteri keńeıtildi. Atap aıtqanda, jumyspen qamtý organdarynda tirkelý, úıde bolýdyń belgilengen ýaqytyn saqtaý jáne psıhobelsendi zattardy qoldanýǵa tyıym salý talaptary engizildi. Qabyldanǵan sharalar sottalǵandardy qaıta áleýmettendirýge, olardyń eńbekpen qamtylýyn qamtamasyz etýge jáne qaıtalama quqyq buzýshylyqtardyń aldyn alýǵa baǵyttalǵan, – delingen resmı jaýapta.
QAJ komıtetiniń málimdeýinshe, júıeni odan ári damytý maqsatynda ınvestıtsııalar tartý jáne jergilikti atqarýshy organdarmen ózara is-qımyldy jolǵa qoıý jumystary jalǵasyp jatyr.
Aıta keteıik, buǵan deıin Abaı oblysynda túrmeden qashyp ketken adam ustalǵanyn jazǵanbyz.
