Elimizde týrızm salasynda kásibı mamandar jetispeıdi

ASTANA. KAZINFORM — 2029 jylǵa deıin bul sektorda jumyspen qamtý kórsetkishin 800 myń adamǵa deıin ulǵaıtý josparlanyp otyr. Bul jóninde QR Týrızm jáne sport mınıstrligi resmı saýalymyzǵa joldaǵan jaýabynda málimdedi.

— Qazaqstan týrızm salasynda kadrlardyń qoljetimdiligi boıynsha 136 eldiń ishinde 71-shi orynda. Bul kórsetkish kadr tapshylyǵynyń bar ekenin dáleldeıdi, — delingen habarlamada.

Atalǵan sektorda 2023 jyly — 520 myń, 2024 jyly — 550 myń, 2025 jyly — 590 myń adam jumys istegen. Al bıyl 640 myń maman qyzmet etip jatyr. Aldaǵy jyldarda bul kórsetkish odan ári joǵarylamaq.

— Týrızm salasyndaǵy mamandar sanyn 2027 jyly — 690 myń, 2028 jyly — 740 myń, 2029 jyly — 800 myńǵa jetkizý josparlanyp otyr, — delingen habarlamada.

Aıta keteıik, respýblıkanyń 49 joǵary jáne joǵary oqý ornynan keıingi bilim berý uıymynda týrızm salasynda kadrlar daıarlanady. Qazir bul mamandyq boıynsha 12 myń azamat bilim alyp jatyr.

Eske salsaq, buǵan deıin Qazaqstanda alǵash ret týrızm salasy boıynsha óńirlik bilim berý-óndiristik klasteri iske qosylǵanyn jazǵanbyz.