Elimizde týrısterge ózimen birge GPS treker alyp júrý mindettelmek
Tótenshe jaǵdaılar vıtse-mınıstri Baýyrjan Syzdyqov jańa zań jobasy aıasynda taýǵa shyqqan nemese ormandy jerlerge shyqqan týrısterge GPS treker berý tártibine túsinik berdi, dep habarlaıdy Kazinform.
Atap aıtqanda, búgin Májiliste azamattyq qorǵaýǵa qatysty zań jobasy tanystyryldy. Osy qujatta týrısterdiń, ekskýrsanttardyń, týrıstik qyzmetti júzege asyratyn adamdardyń, elimiz aýmaǵynda turaqty turatyn azamattar men adamdardyń TJM aýmaqtyq organdaryn aldaǵy júrip-turý marshrýttary týraly habardar etýi jónindegi mindetterin engizý usynyldy.
Baýyrjan Syzdyqovtyń aıtýynsha, elimizge kelgen týrıster nemese Qazaqstan azamattary taýly jerlerde barǵan kezde, adasyp ketip jatady.
«Bul turǵyda atalǵan normalar zańǵa ense, týrıstik mekemeler Tótenshe jaǵdaılar mınıstrliginiń aýmaqtyq bólimshelerine olardyń júretin joldary men baǵdary jaıynda aqparatty berýi kerek. Ekinshiden, zańǵa táýeldi erejeni qabyldamaqpyz. Sonyń aıasynda týrıstik agenttikter adamdy taýǵa, ormandy jerlerge alyp shyqsa, GPS trekerlerdi týrısterge berýi kerek. Bul qurylǵy týrıstiń kıimine nemese júgine bekitilýi tıis», - dedi vıtse-mınıstr.
Onyń paıymynsha osyndaı talaptar adasyp ketken adamdardy tez tabýǵa múmkindik beredi.
