Elimizde turǵyn úıdi paıdalanýǵa berý kólemi artyp keledi
Osy jyldyń 9 aıynda 11,7 mln sharshy metr turǵyn úı paıdalanýǵa berildi. Bul týraly búgin Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy Kazinform agenttiginiń tilshisi.
Mınıstrdiń dereginshe, osy jyldyń 9 aıynda óńdeý ónerkásibinde oń ósý saqtalyp otyr. Óndiris kólemi 3,2 paıyzǵa ósti. Kórsetkishtiń ósýi 14 óńirde tirkeldi. Onyń ishinde eń joǵarǵy ósýdi Almaty qalasy jáne Batys Qazaqstan, Qostanaı, Qyzylorda oblystary kórsetti. Óńdeý ónerkásibi salalary boıynsha mashına jasaý óndirisiniń 27,3 paıyzǵa, onyń ishinde avtomobıl jasaýdyń – 40,8 jáne elektr jabdyqtaryn jasaýdyń 30,6 paıyzǵa ósýi qamtamasyz etildi.
«Sondaı-aq ósý kelesi salalarda baıqalyp otyr: azyq-túlik óndirisi – 3,3, hımııa ónerkásibi – 1,5, metall buıymdary – 4,2, sýsyndar óndirisi – 3,2, plastmassa buıymdary – 6,8, jeńil ónerkásibi – 14,6 paıyz. Taý-ken ónerkásibindegi óndiris kólemi 5,4 paıyzǵa joǵarlady. Bul rette munaı óndirý – 8,4, gaz óndirý – 6,1, ózge de paıdaly qazbalardy óndirý 13,9 paıyzǵka ósti. Metall kenderin óndirý – 1,2, taý-ken ónerkásibinde qyzmet kórsetý – 1,7, kómir óndirý 5,7 paıyzǵa tómendedi», - dedi ol.
Álibek Qýantyrovtyń aıtýynsha, oryndalǵan qurylys jumystarynyń kólemi 12,6 paıyzǵa ulǵaıdy. 19 óńirde oń ósý tirkeldi, ásirese qurylys-montajdaý jumystarynyń eń kóp ósýi Mańǵystaý, Jetisý, Abaı jáne Batys Qazaqstan oblystarynda baıqaldy. Qańtar-qyrkúıekte 11,7 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 11,6 paıyzǵa joǵary. Eń joǵary kórsetkish Astana qalasynda, sondaı-aq Ulytaý, Qyzylorda jáne Abaı oblystarynda tirkeldi.
«Aýyl sharýashylyǵynyń jalpy shyǵarylymy 9,9 paıyzǵa tómendedi. Kórsetkishtiń kúrt tómendeýi aýa raıynyń qolaısyzdyǵyna baılanysty dándi daqyldardy jınaý kóleminiń azaıýynan oryn aldy. Barlyq 7 ekonomıkalyq kórsetkish boıynsha oń ósý 5 óńirde – Abaı, Batys Qazaqstan, Qyzylorda oblystarynda, sondaı-aq Almaty jáne Shymkent qalalarynda baıqaldy», - dedi mınıstr.
