Elimizde tuńǵysh ret kartamen eseptesý kórsetkishi qaǵaz aqshany basyp ozdy

ASTANA. KAZINFORM — Byltyr Qazaqstanda QR-tólemder 5,3 trln teńgeden 11,5 trln teńgege deıin ósken. Sóıtip, tólem jasaýdyń bul túri POS-termınaldan da asyp tústi. Dese de, esep aıyrysýdyń jańa túrleri damyǵanyna qaramastan,eldegi aqsha aınalymynyń 86% qolma qol aqshamen júzege asady. Jýyrda jyl sońyna deıin búkil bankke ortaq QR-kod paıda bolatyny habarlandy. Máselen, dúkende QR-kod arqyly tólem jasaǵyńyz kelse, Halyk nemese Kaspi bar ma dep suramaı-aq, ortaq QR-men tóleı beresizder. Bul týraly Jibek joly telearnasynyń jańalyqtarynda aıtyldy. 

Tól teńgeniń túrin umyta bastaǵanymyz ras. Tipti, qazir ámııan ustaıtyndar da neken-saıaq. Bankomatqa aqsha alýǵa baratyndarǵa qaraǵanda, oǵan aqsha quıatyndar kóp. Bıyl onlaındaǵy qarjy aınalymy 17,7 trln teńgege jetti. Elimizde tuńǵysh ret kartamen eseptesý kórsetkishi qaǵaz aqshany basyp ozdy. Bir jylda qol aqshasyz 1 mlrd 200 mln ret tólem jasalǵan. Bul 2018 jylǵy kórsetkishten 2 ese kóp. Bulaı kete berse, Qazaqstan tsıfrly tranzaktsııa boıynsha 3-4 jylda Kanadany basyp ozǵaly tur. Aınalymdaǵy aqshanyń 90 paıyzy telefondaǵy qosymshalar arqyly jumsalady. Al, qalǵany POS-termınaldarmen júrgiziledi. Ulttyq bank málimetinshe qolma-qol aqsha qazir tek bankomattarǵa salynady.

Dese de, 19 mln 700 myń qazaqstandyqtyń bank kartasy bar. Bir emes birneshe karta ustaıtyndar jetedi. Jalpy, karta sany elde 79 mln dana. Keńinen taralǵan túri debettik kartalar. Olardyń úlesi 80 paıyzǵa jetti. Ekinshi oryndaǵy kredıttik karta úlesi 15,8 paıyz. Qazaqstandyqtar bıyl shetelde karta arqyly 162 mln ret tólem jasaǵan. Onyń aınalymy 2,5 trln teńge.

Aıta ketý kerek, AQSh-taǵy saılaýdan keıin dollar baǵamy nyǵaıa tústi. Búgin aıyrbas pýnktterinde bir dollar 502 teńgege saýdalanyp jatyr.