Elimizde týberkýlez dertinen ólim-jitim 20 paıyzǵa tómendedi

ASTANA. KAZINFORM — Qazir elimizde 8092 adam týberkýlez dertine shaldyqqan patsıent retinde esepte tur.

Bul týraly Densaýlyq saqtaý mınıstrliginiń ulttyq ftızıopýlmonologııa ǵylymı ortalyǵynyń dırektory, Densaýlyq saqtaý mınıstrliginiń shtattan tys bas ftızıatr-dárigeri Málik Ádenov málim etti.

— Bıyl 6 aıdyń qorytyndysy boıynsha eresekter arasynda týberkýlezge shaldyǵý 13,9%-ǵa, al taralýy 16,1%-ǵa, sol sııaqty balalar arasynda týberkýlezben syrqattaný 6,7%-ǵa tómendedi. Jyl basynan beri aldyn alý sharalary men zamanaýı emdeý ádisteriniń nátıjesinde týberkýlezden ólim-jitim 20%-ǵa tómendedi. Taǵy bir aıta ketetin jaıt, ótken jyldan beri 17 jasqa deıingi balalardyń arasynda týberkýlezden qaıtys bolý jaǵdaıy tirkelgen joq, — dedi Málik Ádenov ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń málimdeýinshe, qazir elimizde 8092 adam týberkýlez dertine shaldyqqan patsıent retinde esepte tur. 

— Týberkýlezge qarsy qyzmet jedel dıagnostıka ádisterin belsendi engizip jatyr. Dúnıejúzilik densaýlyq saqtaý uıymy usynǵan jańa týberkýlezge qarsy preparattar men emdeý tásilderin qoldanady. Bul sharalar eldegi týberkýlez boıynsha epıdemıologııalyq jaǵdaıdyń turaqty jaqsarýyna yqpal etedi. Máselen, sońǵy 10 jyldyń ishinde týberkýlezben syrqattaný kórsetkishi 43%-ǵa, onyń taraýy 52%-ǵa, al balalardyń atalǵan indetke shaldyǵýy 50,3%-ǵa, sonymen qatar ólim-jitim 75,6%-ǵa tómendedi, — deıdi ol.

Bıyl naýryzda elimizde týberkýlezden ólim-jitim 50 paıyzǵa azaıǵanyn habarlaǵan edik. 

Aıta keteıik, AQSh ǵalymdary týberkýlezge qarsy kúreste úlken jetistikke jetti.