Elimizde tsıfrlyq teńge jobasy aıasynda alǵashqy jol qoldanysqa berildi
ASTANA. KAZINFORM – Pavlodar oblysynda tsıfrlyq teńgeni engizý boıynsha pılottyq baǵdarlama aıasynda alǵashqy jol jobasy sátti aıaqtaldy.
«QazAvtoJol» málimetinshe, joba jumystary «RF shekarasy (Ombyǵa) - Maıqapshaǵaı» avtojolynyń 383-390 shaqyrym aralyǵyndaǵy 7 shaqyrymdyq ýchaskede júrgizildi. Atalǵan avtojol I tehnıkalyq sanatqa jatady. Bul ýchaskede sońǵy jóndeý jumystary 2015 jyly júrgizilgen bolatyn.
Ortasha jóndeý aıasynda kelesi jumystar atqaryldy:
- 128 800 m2 aýdanda eski jabyn jonyldy;
- 128 800 m2 aýdanda jańa ústińgi qabat tóseldi; - 35 000 m2 aýdanda jol jıegi nyǵaıtyldy;
- 14 shaqyrymda jol tańbalary salyndy.
Tehnıkalyq sıpattamaǵa sáıkes barlyq oryndalǵan jumys kólemi «eQurylys» aqparattyq júıesinde tirkelip, jobanyń júzege asyrylý barysyna tolyq ashyqtyq pen tsıfrlyq baqylaý qamtamasyz etildi.
Joba aıasynda barlyq jumys sátti aıaqtalyp, jol paıdalanýǵa berildi. Onyń júzege asyrylýy jol ınfraqurylymynyń normatıvtik jaǵdaıyn saqtaýǵa, sondaı-aq jol paıdalanýshylarǵa qaýipsiz ári qolaıly qozǵalysty qamtamasyz etedi.
Aıta keteıik, búginde respýblıkalyq mańyzy bar avtojoldardyń boıynda 1500-ge jýyq jol boıy qyzmetteriniń nysandary jumys isteıdi. Olardyń ishinde shaǵyn dámhanalardan bastap iri kópfýnktsıonaldy keshenderge deıin bar.