Elimizde tirkelgen elektromobılder sany 24 myńnan asty
ASTANA. KAZINFORM — Bıylǵy jylǵy 1 maýsymdaǵy jaǵdaı boıynsha Qazaqstanda 24 634 jeńil elektromobıl tirkelgen. Sońǵy 12 aıda olardyń sany 55,6% artty. Bul týraly Ulttyq statıstıka bıýrosy málim etti.
Stat bıýronyń málimetinshe, bir jyl buryn elimizde 15 835 elektromobıl esepte turǵan bolatyn.
Eń kóp elektromobıl Almaty qalasynda tirkelgen. Qala úlesine eldegi barlyq elektromobılderdiń 62% tıesili — 15 280 quraıdy. Sany boıynsha kóshbasshy óńirler úshtigine sondaı-aq Astana qalasy (2 885 birlik) men Almaty oblysy (1 589 birlik) kiredi.
Elektromobılder Qazaqstannyń barlyq óńirlerinde tirkelgenimen, óńirler boıynsha taralýy birkelki emes. Eń tómen kórsetkish Abaı oblysynda — 78 birlik jáne Ulytaý oblysynda — 41 birlik tirkeldi.
Aıta keteıik, bıyl elektromobılderdiń álemdegi úlesi 30%-ǵa jetedi.
