Elimizde tótenshe jaǵdaıdan habardar etý qaǵıdasy jańardy
ASTANA. KAZINFORM – Halyqty tótenshe jaǵdaıdan qulaǵdar etý tártibi jańartyldy.
Tótenshe jaǵdaılar mınıstrliginiń ózgerister men tolyqtyrýlar engizgen qujatta aıtylǵandaı, «Barshanyń nazaryna!» dabyly iske qosylǵan jaǵdaıda habarlaý júıesi halyqqa tótenshe jaǵdaıdyń qaýpi nemese týyndaýy týraly jáne is-qımyl tártibi jónindegi aqparatty bir mezgilde ári birneshe ret jetkizýdi qamtamasyz etedi.
- Birtutas «Barshanyń nazaryna!» dabyl sıgnalynyń uzaqtyǵy – 1 mınýt. Dabyldan keıin uzaqtyǵy 5 mınýtqa deıingi aqparattyq habarlama memlekettik jáne orys tilinde taratylady. 1 saǵat ishinde aqparattyq habarlamany 3 retten artyq qaıtalaýǵa bolmaıdy ári ol habarlaý júıesin paıdalanýdy doǵarý týraly sheshim qabyldanǵannan keıin toqtatylady, - delingen qujatta.
«Barshanyń nazaryna!» dabyl sıgnalynan keıin halyq is-qımyl, ıaǵnı áreket etý nusqaýlyqty alyp, ony oryndaý úshin qolda bar aqparat alý quralyn paıdalanady.
Halyqqa tótenshe jaǵdaıdyń qaýpi týraly profılaktıkalyq sıpattaǵy aqparatty jetkizý sırenalyq-dybystyq qurylǵylar arqyly úsh ret qaıtalap berý, tele- jáne radıohabar taratý jelilerin buǵattaý, mobıldi qosymshalarda, resmı ınternet-resýrstar men áleýmettik jelilerdegi akkaýnttarda jarııalaý, sondaı-aq uıaly baılanys operatorlarynyń jelileri boıynsha, sonyń ishinde Cell Broadcast tehnologııasyn qoldana otyryp, SMS taratý jolymen júzege asyrylady.
Sırenalyq-dybystyq qurylǵylar arqyly aqparat jetkizý ýaqyty saǵat 08:00-den 22:00-ge deıingi aralyqta júzege asyrylady.
Buıryq 2025 jylǵy 2 qyrkúıekten bastap kúshine enedi. Tolyǵyraq siltemege ótip tanysýǵa bolady.
Buǵan deıin Tótenshe jaǵdaılar mınıstriniń buıryǵymen qutqarýshylarǵa ústemeaqy tóleý qaǵıdalary jańartylǵany týraly habarlaǵan edik.