Elimizde tórtinshi uıaly baılanys operatory qashan qurylady
ASTANA. KAZINFORM – Jasandy ıntellekt jáne tsıfrlyq damý mınıstrligi, Telekommýnıkatsııa komıtetiniń tóraǵasy Damır Seısenbaev elimizde tórtinshi uıaly baılanys operatorynyń qurylýyna qatysty pikirin bildirdi.
Ózderińiz biletindeı, eger baılanys operatorlary týraly aıtatyn bolsaq, qazirgi tańda elimizdiń naryǵynda belsendi jumys isteıtin 70-ten astam tirkelgen baılanys operatory bar. Tıisinshe, is júzinde ár óńirde, ár qalada ózińizge qajetti baılanys operatoryn tańdaı alasyz. Al uıaly baılanys naryǵyna keletin bolsaq, qazirgi tańda bizde úsh uıaly baılanys operatory bar. Bul — halyqaralyq tájirıbege sáıkes kórsetkish. Kórshiles memleketterge qaraıtyn bolsaq, olarda ekiden tórtke deıin uıaly baılanys operatory jumys isteıdi. Ózderińiz biletindeı, Tele2 kompanııasyn qatarlyq ınvestordyń satyp alýyna qatysty mámileden keıin úkimetaralyq kelisim jasaldy. Osy kelisimge sáıkes, osy jyldyń sońyna deıin 5G boıynsha aýktsıon ótkize almaımyz. Dálirek aıtqanda, jańa uıaly baılanys operatorlaryn qura almaımyz. Sondyqtan ázirge bul másele talqylanyp jatqan joq, - dedi ol Úkimet otyrysynan keıingi baspasóz máslıhatynda.
Degenmen, komıtet basshysy ártúrli, onyń ishinde sheteldik baılanys operatorlary Qazaqstan naryǵyna belsendi túrde tartyp jatqanyn aıtty. Máselen, 2025 jyly Starlink kompanııasymen kelisim jasaldy. Sondaı-aq eýropalyq spýtnıktik operator — OneWeb kompanııasyna jumys isteýge lıtsenzııa berildi.
- Josparlarymyz ózgergen joq. Úkimetaralyq kelisim bar, soǵan sáıkes jańa operator qura almaımyz. Sonymen qatar qazir halyqaralyq tájirıbeni belsendi túrde zerttep jatyrmyz. Sebebi uıaly baılanys radıojıilikter arqyly jumys isteıdi, al bul — shekteýli tabıǵı resýrs. Kóptegen elde ne bári eki operator bar, keıbirinde úsh operator jumys isteıdi. Tórtinshi operatordy qurý ınfraqurylymnyń jaqsarýyna, qyzmetterdiń qoljetimdi bolýyna jáne tarıfterdiń tómendeýine alyp kelýi tıis. Eger mundaı nátıje bolmasa, onda tórtinshi operatordy qurýdyń qandaı qajeti bar? Qazir bul máseleni tek taldap jatyrmyz. Ázirge eshqandaı naqty jospar quryp otyrǵan joqpyz, - dedi Damır Seısenbaev.
Aıta keteıik, Qazaqstanda baılanys jáne ınternetke qatysty qosymsha aqyly qyzmetterdi qosý tártibi ózgerdi. Endi mundaı qyzmetter abonenttiń eki kezeńdi kelisiminen keıin ǵana iske qosylady.
