Elimizde topyraqty qorǵaý jónindegi talaptar kúsheıtiledi

ASTANA. KAZINFORM – Parlament Májilisiniń qaraýyna «Topyraqty qorǵaý týraly» zań jobasy men ilespe qujat engizildi.

- Zań jobalaryn Parlament depýtattary Memleket basshysynyń segizinshi saılanǵan Parlamenttiń birinshi sessııasynyń ashylýynda bergen tapsyrmasyn oryndaý boıynsha ázirledi. Negizgi zań jobasynyń maqsaty – topyraqty tıimdi saqtaýdyń quqyqtyq negizderin qurý, topyraqtyń qunarlyǵyn arttyrý, jerdiń tozýyn boldyrmaý, - dedi Májilistiń Agrarlyq máseleler komıtetiniń tóraǵasy, depýtat Serik Egizbaev palatanyń jalpy otyrysynda.

Onyń aıtýynsha, ilespe zań jobasy qoldanystaǵy zańnamany negizgi zań jobasynyń normalaryna sáıkes keltirý maqsatynda ázirlendi.

- Ol «Jer kodeksi» men «Agroónerkásiptik keshendi jáne aýyldy aýmaqtardy damytýdy memlekettik retteý týraly» Zańǵa jerdiń kadastrlyq qunyn anyqtaýdyń naqty tetikterin belgileýge baǵyttalǵan ózgeristerdi eskerip otyr. Atap aıtqanda, «Azamattarǵa arnalǵan úkimet» memlekettik korporatsııasy» KEAQ fýnktsııalary bólinetin bolady. Bul qoǵam tek eldi mekendergi jerdiń qunyn anyqtaıdy. Al aýyl sharýashyǵyna arnalǵan jerdiń qunyn anyqtaý GIPROZEM memlekettik kásipornyna berilmek. Sondaı-aq jer paıdalanýshylardyń topyraqty qorǵaý jónindegi mindetteri naqtylanady. Májilistiń Agrarlyq máseleler komıteti atalǵan zań jobalary boıynsha qorytyndy ázirleýge daıyn, - dedi depýtat.

Buǵan deıin qazaq ǵalymy topyraqty tozdyrmaıtyn gel jasap jatqanyn jazǵan edik.