Elimizde topyraqty qorǵaý tehnologııalary engiziledi
ASTANA. KAZINFORM — Búgin Senatta «Topyraqty qorǵaý týraly» QR Zańy jáne oǵan ilespe qujat eki oqylymda qaralyp, maquldandy.
— «Topyraqty qorǵaý týraly» Zań — elimizdiń tabıǵı resýrstaryn saqtaý, aýyl sharýashylyǵy jerleriniń ónimdiligin arttyrý jáne azyq-túlik qaýipsizdigin qamtamasyz etý baǵytyndaǵy mańyzdy quqyqtyq qujat, — dedi Senat depýtaty Álı Bektaev.
Onyń sózinshe, búginde Qazaqstanda jel jáne sý erozııasy, tuzdaný, shóleıttený, organıkalyq zattardyń azaıýy, jaıylymdardyń tozýy sııaqty topyraqtyń degradatsııasyna alyp keletin faktorlar kóbeıip otyr. Bul úrdis aýyl sharýashylyǵy óndirisiniń tıimdiligine ǵana emes, ekologııalyq turaqtylyqqa, jer resýrstarynyń sapasyna jáne turǵyndardy sapaly azyq-túlikpen qamtamasyz etýge keri áserin tıgizip jatyr.
Sonymen birge, Álı Bektaev Agrarlyq máseleler, tabıǵatty paıdalaný jáne aýyldyq aýmaqtardy damytý komıteti óz mindettemelerin tolyq atqaryp shyqqanyn baıandady.
— VIII shaqyrylym barysynda Komıtet depýtattarynyń bastamasymen agrarlyq salany, ekologııalyq ahýaldy keshendi retteýge baǵyttalǵan birqatar zańdar ómirge keldi. Atap aıtqanda, «Organıkalyq ónim óndirisi jáne aınalymy týraly» zań organıkalyq eginshilikti damytý arqyly topyraqtyń tabıǵı qunarlyǵyn saqtaýǵa, hımııalyq júktemeni azaıtýǵa jáne tabıǵı resýrstardy basqarýdyń ornyqty júıesin qalyptastyrýǵa baǵyttalǵan mańyzdy normatıvtik qujat boldy. Sonymen qatar, jaıylymdyq jerlerdi utymdy paıdalanýǵa, olardyń tozýyn tómendetýge, mal jaıý júktemesin ǵylymı negizde retteýge jáne degradatsııalanǵan jerlerdi qalpyna keltirýge negizdelgen «Jaıylymdar týraly» zań qabyldandy. Sondaı-aq «Erekshe qorǵalatyn tabıǵı aýmaqtar týraly» zańǵa qundy topyraq jamylǵysyn saqtaý jáne tabıǵı landshaftardyń turaqtylyǵyn qamtamasyz etýge múmkindik beretin normalar engizilgen bolatyn. Osylaısha, agrarlyq komıtet depýtattarynyń bastamashyldyǵymen jasalǵan «Topyraqty qorǵaý týraly» zań joǵaryda atalǵan zańdardyń logıkalyq jalǵasy bolyp tabylatyn jáne elimizde topyraqty qorǵaý salasyndaǵy quqyqtyq negizderdi tolyq qalyptastyratyn derbes zań bolaıyn dep otyr, — dedi ol.
Senatordyń aıtýynsha, Zańdaǵy mańyzdy novellalardyń biri — topyraqty qorǵaý jónindegi is-sharalardyń tolyq júıesin zań deńgeıinde bekitý. Onyń ishinde, agrohımııalyq jáne melıoratsııalyq zertteýler júrgizý, bonıtetteý, monıtorıng uıymdastyrý, topyraq qorǵaý tehnologııalaryn engizý, tyńaıtqyshtardy ǵylymı negizde paıdalaný sharalary qarastyrylǵan.
Budan bólek, zań ǵylymı zertteýlerdi damytýǵa, tsıfrlyq tehnologııalardy, qashyqtyqtan zondtaý quraldaryn jáne zamanaýı monıtorıng júıelerin keńinen paıdalanýǵa quqyqtyq negiz qalaıdy. Bul jer resýrstaryn basqarýdyń tıimdiligin arttyryp, topyraqtyń sapasyn ýaqtyly baǵalaýǵa múmkindik beredi.
— Bir sózben aıtqanda, «Topyraqty qorǵaý týraly» Zań — agrarlyq sektordyń turaqty damýyn qamtamasyz etýge baǵyttalǵan mańyzdy ári júıeli zańnamalyq bastama, — dep túıindedi Álı Bektaev.
Aıta keteıik, buǵan deıin topyraqtyń qunarlyǵy týraly málimetter biryńǵaı bazaǵa engiziletinin jazǵanbyz.
