Elimizde tólqujatty onlaın qaıta shyǵarý iske qosylmaq

ASTANA. KAZINFORM — Bıyl elimizde tólqujatty onlaın formatta qaıta shyǵarý qyzmeti iske qosylmaq. Bul týraly Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın aıtty. 

— Bıyl bul qyzmetti keńeıtip, Іshki ister mınıstrligimen tólqujatty onlaın formatta qaıta shyǵarýdy josparlap otyrmyz, — dedi birinshi vıtse-mınıstr Úkimet otyrysynan keıingi brıfıngte.

Onyń aıtýynsha, alǵashqy ýaqytta qujattar qaıtalap qana shyǵarylady.

— Qazirgi ýaqytta qujattardy birinshi ret shyǵarý barynsha sezimtal másele. Durysynda dál sol adam atalǵan qyzmetti alatyndyǵyna senimdi bolýymyz qajet. Óıtkeni, sýretke túsedi, qoltańbasyn qaldyrady, — dedi ol.

Rostıslav Konıashkın tsıfrlyq servısterdi engizý kezeń-kezeńmen júretinin aıtady.

— Biz protsestiń azamattarǵa yńǵaıly, qaýipsiz ekenine jáne de shynymen de tıimdi jumys isteıtindigine kóz jetkizip, senimdi bolýǵa tıispiz, — dedi birinshi vıtse-mınıstr.

Ol elimizde júrgizýshi kýáligin onlaın rásimdeý jumys istep turǵanyn, aldaǵy ýaqytta bul qyzmetti tolyqtaı tsıfrlyq formatqa kóshirý josparlanǵanyn atap ótti. Bul rette Halyqqa qyzmet kórsetý ortalyǵyna kelip te qyzmet alýǵa múmkindik qala beredi.

Buǵan deıin Halyqqa qyzmet kórsetý ortalyqtary Tsıfrlyq keńsege aınalatynyn jazǵan edik.