Elimizde terezelerdi qymtaý qyzmetiniń quny qansha
ASTANA. KAZINFORM – Óńirlerdiń kóbinde kún salqyndap, páterdegi terezelerdiń sańylaýynan jel kire bastady. Ony biteý, bekitý qyzmeti qazir keń taraǵan. Plastıkalyq terezeniń rezeńkelerin aýystyryp, ilmeginiń buraýyn keltirý qyzmetiniń quny ár óńirde ártúrli bolyp keledi.
Qystyń qamyn erte oılaǵan adamdar áldeqashan sheberdi shaqyryp, tereze sańylaýyn qamtap qoıdy. Al taǵy bir toby bul sharýany keıinge qaldyrǵan. Qys aılary endi bastalatynyn eskersek, jumysty erteńge qaldyrmaǵan abzal. Eger terezeden jel soǵyp tursa, sizge jylý batareıalary da kómektese almaıdy. Óz úıińizde búrseń qaǵyp júrgińiz kelmese, sheberdi shaqyryp, qymtap alǵan abzal.
Elimizde jóndeý sheberleri birneshe qyzmet túrin usynady. Oǵan tutqasyn bekitip, ilmegin qataıtý, qajet bolsa tazartyp, maılaý jáne rezeńkesin aýystyrý qyzmetteri kiredi. Tereze aldynan jel soǵyp turmaýy úshin ishten jáne syrttan bekitedi. Aqysy qyzmet túrine qaraı tólenetin bolǵan soń tapsyrys bermes buryn kelisip alǵan durys. Máselen, tereze durys jabylmaı tur nemese jel soǵady. Rezeńkeni aýystyrý úshin onyń uzyndyǵyn ólsheýge týra keledi. Kóbine 3-4 metr rezeńke qajet bolady. Al ilmeginiń buraýyn keltirip berse ár terezege bólek esepteıdi. Sheberdi shaqyrǵan kezde aýystyratyn zattary týraly suraǵan jón. Keıde ony da bólek satyp alýǵa týra keledi.
Taǵy bir eskere keterlik jaıt, jóndeý sheberleri ádette tómen baǵa aıtady. Keıin terezeni, jaqtaýyn, ilmegi men rezeńkeni qarap, jańa qyzmetterdi qosyp, baǵany kóterýi múmkin.
Terezelerdi qymtaý, jóndeý baǵasy Kókshetaý qalasynda joǵary. Qystyń borandy jáne aıazdy kúnine daıyndaý kezinde rezeńkesin aýystyrsa ár metrine 1 500 teńge tóleıdi. Tereze ilmegin tekserip, qataıtyp berse kem degende 5 000 teńge suraıdy. Osy eki qyzmetti qossa 10 000 teńge alady. Jaqtaýlaryndaǵy sańylaýdy bekitip berse 1 500 – 2 000 teńge alady. Tereze syrtynan kóbikti jelim jaqsa qyzmet quny 9 000 teńgeden bastalady. Sheberler jumysty naqty baǵamdaǵannan keıin ǵana shyǵynyn aıta alady. Shamamen bul qalada qyzmet quny 20 000 teńgege shyǵady.
Odan ári Qostanaı qalasy tur. Tereze ilmegin jóndeý baǵasy 4 000 teńgeden bastalady. Rezeńkesin aýystyrý kezinde ár metri esepteledi. Jaqtaýdan jel soǵyp tursa qymtaý úshin metrine 2 000 teńge alady. Baǵa qala turǵyndary úshin qoljetimdi bolýy múmkin. Alaıda ózge óńirlermen salystyrǵanda edáýir joǵary bolyp tur. Qalada bir terezege 15 000 – 20 000 teńge qajet bolady. Astana qalasynda da qyzmet quny dál osy shamalas. Bir terezeni qymtap, jóndeý úshin orta eseppen 17 500 teńge qajet. Eger sheberdi izdep, saýdalassańyz baǵa da tómendeıdi. Qostanaıǵa qaraǵanda jel ótkizbeıtin rezeńkeni aýystyrý baǵasy tómen, al ilmekti retteý baǵasy joǵary.
Aqtóbe, Óskemen men Jezqazǵan qalalarynda terezeni qysqa daıyndaý úshin 15 000 teńge qajet bolady. Sheberdiń jumysyna qaraı baǵa da ártúrli. Máselen Aqtóbe qalasynda tereze ilmegin rettep berse, 6 000 teńge alady. Óskemende qyzmettiń bul túri eki ese arzan.
Almaty qalasynda ilmekti jóndeý baǵasy 5 000 – 7 000 teńge aralyǵynda. Al jel ótkizbeıtin rezeńkeni aýystyrý baǵasy qoljetimdi. Ár metrine 1 000 – 1 500 teńge suraıdy. Jaqtaýynan jel úrgep tursa ár metrin 1 500 teńgege bitep beredi. Degenmen habarlandyrýdyń kóbinde bul qyzmettiń quny 2 500 teńgeden bastalady. Almatylyq jóndeý sheberleri bir terezeni 8 000 myń teńgege, kóp degende 20 000 teńgege daıyndap beredi.
Shymkent qalasynda bir terezeni jóndep, sańylaýyn bekitý jumysyna sheberler 10 000 – 14 000 teńge suraıdy. Plastıkalyq tereze rezeńkesiniń metrin 560 – 1 500 teńgege aýystyrady. Terezeni ashyp, jabýǵa arnalǵan ilmekti 5 000 – 8 000 teńgege jóndep beredi. Jel úrlep tursa 3 000 – 10 000 teńgege bekitedi. Al sheber tazartyp, maılap berý qyzmetin 1 000 – 2 500 teńgege baǵalaıdy.
Elimizdiń soltústiginde jáne ońtústiginde ortasha baǵa tirkeldi. Terezeni jóndeý, qystyń borandy kúnine daıyndaý úshin 10 000 – 11 000 teńge qajet. Degenmen keıbir qyzmet túriniń baǵasynda aıyrmashylyq bar. Petropavl qalasynda jaqtaýdy biteý qyzmetiniń ár metri 4 000 teńgeden bastalady. Qaraǵandy men Pavlodar qalalarynda ilmektiń ilimin keltirip, jóndeý baǵasy 4 000 teńgeden bastalady. Plastıkalyq tereze rezeńkesin aýystyrý, jaqtaýdy bekitý baǵasy da osy shamalas.
Taraz qalasynda tereze jóndeý baǵasy – 4 000 – 10 000 teńge. Oral, Atyraý, Qonaev, Aqtaý men Túrkistan qalalarynda ortasha baǵa – 6 000 – 9 000 teńge aralyǵynda. Tarqatyp aıtar bolsaq, aqtaýlyqtar Oralǵa qaraǵanda tereze ilmegin retteýge eki ese az aqsha tóleıdi. Baǵa birinde 1 750 teńge bolsa, ekinshi óńirde 4 000 teńge. Rezeńkeni aýystyrý, jaqtaýdy bekitýde ár metri 1 000 – 1 200 teńge bolady. Oral qalasynda osy eki qyzmet túriniń baǵasy ózge óńirge qaraǵanda joǵary.
Semeı qalasynda terezeni qysqa qamdaý baǵasy 4 000 – 10 000 teńge bolyp tur. Іlmekti jónge keltirý qyzmetiniń quny – 3 500 teńge, jel jibermeıtin rezeńkeni aýystyrý, jaqtaýdy bekitý úshin ár metrine 1 000 – 1 500 teńge esepteledi.
Qyzylorda qalasynda baǵa tómen. Tereze ilmegin retteýge shamamen 3 000 teńge alady. Al rezeńkeniń metrin 1 000 – 1 200 teńgege aýystyrady. Bir terezege shamamen 5 000 – 8 000 teńge jetkilikti.
Qazirgi kezde eń tómen baǵa Taldyqorǵan qalasynda bolyp tur. Munda jel ótkizbeýge arnalǵan qyzmetter úshin 4 000 – 6 000 teńge alady. Al eki qyzmetti bólek eseptese ár metrine 1 000 – 1 500 teńge eseptep beredi. Іlmektiń ilimin keltirý quny shamamen – 3 000 teńge.
Eske salsaq, buǵan deıin Qazaqstan qalalaryndaǵy jylytqyshtyń baǵasy týraly jazǵan edik.