Elimizde telemedıtsınany damytýǵa kedergi keltiretin negizgi máseleler ataldy
ASTANA. KAZINFORM – Qazaqstanda telemedıtsınany damytýǵa ınternettiń sapasy, tsıfrlyq ınfraqurylymnyń jetkiliksizdigi jáne maman tapshylyǵy kedergi keltirip otyr. Bul týraly Ulttyq ǵylymı densaýlyq saqtaýdy damytý ortalyǵynyń Kazinform agenttiginiń saýalyna bergen jaýabynda aıtyldy.
Ortalyq basqarma tóraǵasynyń orynbasary Ádilet Tabarovtyń sózinshe, telemedıtsınany damytýǵa eń aldymen shalǵaı eldi mekenderdegi ınternettiń turaqsyzdyǵy kedergi bolyp otyr.
– Alys eldi mekenderdegi ınternettiń turaqsyzdyǵy, baılanys jyldamdyǵynyń tómendigi telemedıtsınanyń damýyna kedergi keltirip otyr. Sonymen qosa telemedıtsına platformalary men medıtsınalyq aqparattyq júıeler arasynda aqparat almasýdyń tolyq jolǵa qoıylmaýy da qashyqtan medıtsınalyq kómek kórsetýdi qıyndatyp keledi, - dedi ol.
Sonymen birge ol barlyq medıtsınalyq uıym birdeı telemedıtsına qyzmetin kórsetýge qajetti tehnıkamen jabdyqtalmaǵanyn da eske salyp ótti.
– Tsıfrlyq júıelermen jumys isteı alatyn medıtsına qyzmetkerleriniń tapshylyǵy da bul baǵyttyń damýyn baıaýlatyp otyr. Sonymen birge qashyqtan keńes alatyn adamnyń jeke basyn rastaý tártibin naqtylaý, medıtsınalyq derekterdiń qaýipsizdigin qamtamasyz etý jáne qashyqtan berilgen dáriger keńesin rásimdeý men esepke alý qaǵıdalaryn jetildirý qajet. Mine, negizinen osyndaı faktorlar telemedıtsına salasynyń damýyn tejep otyr desek bolady, - dedi spıker.
Aıta keteıik, buǵan deıin Densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizgen edi.
