Elimizde tehnıkalyq baıqaýdan ótkizý qaǵıdalary ózgerdi
ASTANA. KAZINFORM — Qazaqstanda mehanıkalyq kólik quraldary men olardyń tirkemelerin mindetti tehnıkalyq baıqaýdy uıymdastyrý jáne ótkizý qaǵıdalaryna ózgerister engizildi.
Negizgi ózgeristerdiń biri mindetti tehnıkalyq baıqaýdyń biryńǵaı tsıfrlyq júıesiniń jumysyna qatysty. Tehnıkalyq baıqaý ortalyqtary dıagnostıka nátıjeleri týraly tolyq ári shynaıy aqparatty osy júıege engizýi tıis.
Nómirlik agregattardyń sáıkessizdigi, memlekettik tirkeý nómirlik belgileriniń bolmaýy nemese kólik quraly konstrýktsııasyna zańsyz ózgerister engizilgeni anyqtalǵan jaǵdaıda operator bul týraly ishki ister organdaryna dereý habarlaýy kerek.
Qaǵıdalarda kólik quralynyń sanatyna qaraı tehnıkalyq baıqaýdyń uzaqtyǵy belgilengen:
O-1, L-1-7 – 15 mınýtqa deıin;
M-1 – 20 mınýtqa deıin;
M-2, M-3, N-1, N-2, N-3, O-2, O-3, O-4 – 30 mınýtqa deıin.
Turaqty jáne mobıldi jelilerde júrgizilgen tehnıkalyq baıqaý týraly málimetter biryńǵaı tsıfrlyq júıege engizilgende, tekserýdiń naqty ýaqyty men orny kórsetilýi qajet.
Turaqty jelilerden aqparat kún saıyn naqty ýaqyt rejıminde, dál qazirgi sátte beriledi, al mobıldi jelilerden – eki kúntizbelik kúnde bir ret jiberiledi.
Dıagnostıkalyq karta biryńǵaı tsıfrlyq júıemen ıntegratsııalanǵan arnaıy baǵdarlamalyq qamtamasyz etý arqyly elektrondy túrde rásimdeledi.
Dıagnostıkalyq karta joǵalǵan nemese búlingen jaǵdaıda kólik ıesi qujatty buryn bergen operatordan onyń telnusqasyn ala alady. Telnusqa tehnıkalyq baıqaýdan qaıta ótpeı-aq 15 mınýt ishinde beriledi jáne joǵalǵan nemese búlingen kartanyń qoldanylý merzimi aıaqtalǵanǵa deıin jaramdy bolady.
Sonymen qatar derekterdiń durystyǵyna baqylaý kúsheıtildi. Biryńǵaı tsıfrlyq júıeniń operatory salalyq qaýymdastyqtar men qoǵamdyq birlestikterdiń ókilderimen birlesip tekserý júrgizedi. Atap aıtqanda, arnaıy baǵdarlamalyq qamtamasyz etýdiń belgilengen talaptarǵa sáıkestigi jylyna eki ret tekseriledi.
Júıede kólik quraly týraly rastalǵan málimetter bolmaǵan jaǵdaıda dıagnostıkalyq kartany berýden avtomatty túrde bas tartý jáne jalǵan dıagnostıkalyq kartalardy anyqtaý múmkindigi qarastyrylǵan.
Erejeni buzý faktileri anyqtalǵan jaǵdaıda tehnıkalyq baıqaý operatoryna biryńǵaı tsıfrlyq júıeniń qyzmetterin usyný toqtatylýy múmkin. Al buzýshylyqtar joıylyp, ol biryńǵaı tsıfrlyq júıeniń operatory tarapynan rastalǵannan keıin júıege qoljetimdilik qaıta qalpyna keltiriledi.
Budan bólek, tehnıkalyq baıqaý nátıjeleri týraly kelip túsetin derekterge aptasyna keminde eki ret monıtorıng júrgiziledi. Baǵdarlamalyq qamtamasyz etýdiń belgilengen talaptarǵa sáıkes kelmeıtini anyqtalǵan jaǵdaıda biryńǵaı tsıfrlyq júıege derekter jiberý múmkindigi buǵattalady.
Buıryq 19 qazannan bastap kúshine endi.
Aıta keteıik, buǵan deıin Qazaqstan tehnıkalyq baıqaýdy tsıfrlandyrý úshin Ispanııa tájirıbesin engizetinin jazǵanbyz.
