Elimizde Tazarý kúnine eki myń jas belsene qatysty

ASTANA. KAZINFORM — 23 naýryz — Tazarý kúni elimizdiń barlyq óńirinde keń kólemde atap ótilip, oǵan jastar belsendi atsalysty, dep habarlaıdy Mádenıet jáne aqparat mınıstrliginiń baspasóz qyzmeti.

Іs-sharalarǵa elimizdiń jetekshi jastar jáne qoǵamdyq uıymdary qatysty. Jalpy qatysýshylar sany shamamen 2 myń adam.

— Aıtýly bastamalardyń biri — ekologııalyq mádenıet pen jeke jaýapkershilikti qalyptastyrýǵa baǵyttalǵan «Ózińnen basta» chellendji. Bastamany «Jasyl El» jastar eńbek jasaqtarynyń músheleri qolǵa alyp, ol búkil el jastary arasynda keń qoldaý taýyp, barlyq óńirdi qamtydy. Sonymen qatar óńirlik jastar resýrstyq ortalyqtary merekelik is-sharalar aıaqtalǵannan keıin qoǵamdyq keńistikter men Naýryz toılanǵan oryndardy tazalaý jumystaryn júrgizdi, — delingen aqparatta.

Elimizdiń ońtústik óńirleriniń jastary tabıǵı bulaqtar men sý kózderin tazartýǵa baǵyttalǵan «Móldir bulaq» ekologııalyq aktsııasyna belsendi qatysty.

Atalǵan is-sharalar Naýryz dástúrinde ornyqqan tazalyq, tabıǵatqa janashyrlyq jáne ekologııalyq jaýapkershilik qundylyqtary tóńireginde jastardyń toptasýynyń jarqyn kórinisine aınaldy.

Osyǵan deıin qazaqstandyq eriktiler el turǵyndaryn «Móldir bulaq» ekologııalyq aktsııasyn qoldaýǵa shaqyrdy.