Elimizde tamyz aıynda bes iri festıval ótedi
ASTANA. KAZINFORM – Tamyz aıynda Astana men tórt óńirde týrısterge arnalǵan bes iri festıval men shoý ótedi. Bul týraly Týrızm ındýstrııasy komıteti tóraǵasynyń orynbasary Aıdyn Qapashev aıtty.
Vedomstvo málimetinshe, tamyz aıynda Astana qalasy, Atyraý, Qostanaı, Mańǵystaý jáne Almaty oblystarynda týrısterdi tartýǵa baǵyttalǵan bes iri is-shara uıymdastyrylady.
– Olardyń qatarynda 1 tamyzda Qostanaı oblysynda ótetin «Qostanai Dala Fest» agrofestıvali, 6–9 tamyz aralyǵynda elordadaǵy «Comic Con Astana» gık-festıvali, 15 tamyzda Mańǵystaý oblysyndaǵy «Aq maya Fest» shubat festıvali, 15–16 tamyz kúnderi Atyraý oblysyndaǵy «LOTOS» ekologııalyq festıvali jáne 16 tamyzda Almaty oblysynda ótetin «Baıserke aspany» avıashoýy bar, - dedi spıker.
Sonymen qatar ol halyqaralyq aýdıtorııanyń qyzyǵýshylyǵyn týdyratyn erekshe bastamalarǵa da qoldaý kórsetiletinin atap ótti.
– Sonyń biri – Drive Forum GREAT ORDA festıvali. Mad Max postapokalıpsıs álemi stılinde ótetin is-sharaǵa Qazaqstan, Reseı, Ózbekstan, Qyrǵyzstan jáne basqa da elderden 1,5 myńnan astam saıahatshy men belsendi demalys áýesqoıy keledi dep josparlanyp otyr, - dedi spıker.
Aıta keteıik, buǵan deıin Abaı oblysynda alǵash ret «Alakól alaýlary – 2026» mádenı-týrıstik festıvali ótken edi.
