Elimizde taǵy eki jol aqyly bolady

ASTANA. KAZINFORM — Qazaqstanda 2025 jylǵy 22 aqpannan bastap eki jol aqyly bolady. Onyń biri — «Qostanaı — RF shekarasy» bolsa, ekinshisi — «Aqtóbe — RF shekarasy» joly.

QR Kólik mınıstriniń m. a. 2025 jylǵy № 39 jáne № 40 buıryqtaryna sáıkes «Qostanaı — RF shekarasy» (Troıtske) jáne «Aqtóbe — RF shekarasy» (Orynborǵa) avtojoldarynyń ýchaskeleri avtobýs pen júk kólikterine aqyly bolady.

1. «Qostanaı — RF shekarasy (Troıtske)» avtojolynyń 539-376 shaqyrym aralyǵyndaǵy ýchaskesi (M-36). Júrgizýshilerge «RF shekarasy (Ekaterınbýrgke) — Almaty» respýblıkalyq mańyzy bar avtomobıl joly jáne «Qostanaı — Rýdnyı — Aıet — RF shekarasy» aýdandyq mańyzy bar avtomobıl joldary arqyly balamaly jol usynylady.

Aqyly ýchaskeniń uzyndyǵy 163 shaqyrymdy quraıdy. ІІ jáne ІІІ tehnıkalyq sanattan turady. Júrip ótý jolaǵynyń eni — keminde 3,5 metr, qozǵalys jolaqtyń sany — 2 jáne 1 eki baǵytta jolaq.

2. II sanattaǵy Aqtóbe — Mártók — RF shekarasy (Orynborǵa) respýblıkalyq mańyzy bar jalpyǵa ortaq paıdalanylatyn avtomobıl jolynyń Aqtóbe — Reseı Federatsııasynyń shekarasy (Orynborǵa) 17+000 — 99+692 km ýchaskesi.

Júrip ótý Aqtóbe — RF shekarasy (Orskqa) respýblıkalyq mańyzy bar balamaly jol arqyly júzege asyrylýy múmkin.

Aqyly jol ýchaskesiniń uzyndyǵy 82 shaqyrym 692 metrdi quraıdy. Jol ІІ sanatqa jatady, onyń eni — keminde 3,75 metr, al jolaǵynyń sany — eki baǵytta 1 jolaq.

— Arkalarda ornatylǵan joǵary jyldamdyqty kameralar aqyly ýchaskelerde avtomobılderdiń qozǵalysyn, olardyń jyldamdyǵy men qarqyndylyǵyn tirkeıdi. Avtojolda tólem beketteri bolmaıdy, onyń ornyna yńǵaıly «ashyq» tólem júıesi qoldanylady. Shlagbaýmdar men ótkizý pýnktteri qoıylmaǵandyqtan keptelister bolmaıdy, bul qosymsha qaýipsizdikti qamtamasyz etip, sapar ýaqytyn qysqartady. Jol júrý tólemi qolma-qol aqshasyz júrgiziledi. Paıdalanýshylardyń qolaılyǵy úshin tólem jasaýdyń 10-ǵa jýyq ádisi bar: ınternet-bankıngter, tólem termınaldary men elektrondyq ámııandar, uıaly telefon balansynan, E100 janarmaı kartasy arqyly, jáne zańdy tulǵalarmen kelisim shart jasaý. Aldyn-ala tólem áldeqaıda arzan bolǵandyqtan, tólemaqyny ýaqtyly jasaýǵa keńes beremiz, — delingen «QazAvtoJol» taratqan aqparatta.

Aqtóbe — RF shekarasy (Orynborǵa) avtojolynyń bir baǵyttaǵy jol aqysynyń quny:

— 16 orynǵa deıingi avtobýstar jáne júk kótergishtigi 2,5 t deıin júk avtomobılderi úshin: aldyn ala tólem — 515 teńge, keıingi tólem — 600 teńge;

— 32 orynǵa deıingi avtobýstar jáne júk kótergishtigi 5,5 t deıin júk avtomobılderi úshin: aldyn ala tólem — 1040 teńge, keıingi tólem — 1220 teńge;

— 32 oryn nan asatyn avtobýstar jáne júk kótergishtigi 10 t deıin avtopoezdar úshin: aldyn ala tólem — 1545 teńge, keıingi tólem — 1820 teńge;

— Júk kótergishtigi 10 t joǵary 15 t deıingi júk avtomobılderi úshin: aldyn ala tólem — 2080 teńge, keıingi tólem — 2440 teńge;

— Júk kótergishtigi 15 t joǵary júk avtomobılder, onyń ishinde tirkemeleri bar ershikti tartqyshtar úshin: aldyn ala tólem — 2580 teńge, keıingi tólem — 3040 teńge.

Qostanaı — RF shekarasy (Troıtske) avtojolynyń bir baǵyttaǵy jol aqysynyń quny:

— 16 orynǵa deıingi avtobýstar jáne júk kótergishtigi 2,5 t deıin júk avtomobılderi: aldyn ala tólem — 1010 teńge, keıingi tólem — 1190 teńge;

— 32 orynǵa deıingi avtobýstar jáne júk kótergishtigi 5,5 t deıin júk avtomobılderi: aldyn ala tólem — 2055 teńge, keıingi tólem — 2415 teńge;

— 32 orynnan asatyn avtobýstar jáne júk kótergishtigi 10 t deıin avtopoıyzdar: aldyn ala tólem — 3065 teńge, keıingi tólem — 3610 teńge;

— júk kótergishtigi 10 t joǵary 15 t deıingi júk avtomobılderi: aldyn ala tólem — 4100 teńge, keıingi tólem — 4825 teńge;

— Júk kótergishtigi 15 t joǵary júk avtomobılderi, onyń ishinde tirkemeleri bar ershikti tartqyshtar: aldyn ala tólem — 5120 teńge, keıingi tólem — 6030 teńge.

Osyǵan deıin Kazinform tilshisi aqyly joldar nege kóbeıip jatqanyn jáne aqyly joldan túsken aqsha qaıda ketip jatqanyn zerdelep kórdi.