Elimizde taǵy da alty eldi meken vaýcherlik qarjylandyrýǵa qosyldy

ASTANA. KAZINFORM — Qazaqstanda vaýcherlik qarjylandyrý ádistemesin qoldana otyryp, mektepke deıingi tárbıe men oqytýǵa memlekettik tapsyrysty derbestendirý boıynsha jumystar jalǵasyp jatyr, dep habarlaıdy Oqý-aǵartý mınıstrliginiń baspasóz qyzmeti.

2024 jyldan bastap Taraz, Túrkistan, Shymkent, Oral jáne Astana qalalarynda mektepke deıingi bilim berýdi vaýcherlik qarjylandyrý júıesi sátti engizildi. Al 2025 jyldyń naýryz aıynan bastap pılottyq jobaǵa Semeı, Óskemen, Jezqazǵan, Qaraǵandy qalalary, sondaı-aq Baızaq jáne Saryaǵash aýdandary qosyldy.

— Bul mehanızm memlekettik qyzmetterdi ashyq jáne tıimdi kórsetýge, jáne mektepke deıingi uıymdar arasynda memlekettik tapsyrysty bólýge baǵyttalǵan. Jańa júıeniń negizgi artyqshylyǵy — balabaqshalar arasyndaǵy salaýatty básekelestik jáne ata-analarǵa arnalǵan bilim berý mekemesin tańdaý erkindigi esebinen qyzmet kórsetý sapasyn arttyrýda, — deıdi Mektepke deıingi bilim departamentiniń dırektory Manara Adamova.

Aıta ketý kerek, vaýcherlik qarjylandyrýdyń pılottyq jobasyn iske asyrýdyń arqasynda Taraz qalasynyń balabaqshalaryna kezek 12 esege — 24 myńnan 2 myńǵa deıin, al Túrkistanda — 5 esege — 850-den 169-ǵa deıin qysqardy. Osyndaı jaǵdaı basqa aımaqtarda da baıqalady. Jobany bıylǵy jyldyń sońyna deıin basqa óńirlerde de masshtabtaý josparlanyp otyr.

Osydan buryn óńirler vaýcherlik qarjylandyrýdy engizý tájirıbesin ıgerip jatqany habarlandy.