Elimizde taǵy bir avtojolda jyldamdyq 60 km/saǵ deıin shekteledi

ASTANA. KAZINFORM — Astana — Şýchınsk baǵyty boıynsha 3.24 «Eń joǵary jyldamdyqty saǵatyna 60 shaqyrymǵa shekteý» jol belgileri qoıyldy, dep habarlaıdy Polisia.kz.

ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranovanyń málimetinshe, qańtar aıynda elimizde kóptegen iri jol apaty tirkeldi.

— Aýa raıynyń ózgerýi joldaǵy qaýipsizdikke aıtarlyqtaı áser etýi múmkin. Sondyqtan belgilengen normalar men qaǵıdalardy saqtaý óte mańyzdy. Qańtar aıynyń ózinde iri jol apattary tirkeldi. Negizgi sebep — kóriný múmkindiginiń tómendeýi kezinde qaýipsiz jyldamdyqty saqtamaý, — dep atap ótti ol.

Aǵa ınspektor atap ótkendeı, eki respýblıkalyq mańyzy bar jolǵa shekteý qoıyldy.

— Sondyqtan azamattardyń ómiri men densaýlyǵyna qaýip tóndirmeý úshin kólik aǵyny kóp jol ýchaskelerinde jyldamdyqty shekteý týraly sheshim qabyldandy. Atap aıtqanda, Astana — Şýchınsk jáne Astana — Qaraǵandy baǵyttary boıynsha 3.24 «Eń joǵary jyldamdyqty saǵatyna 60 shaqyrymǵa shekteý» jol belgileri qoıyldy. Olar nashar kóriný, kóktaıǵaq nemese basqa da aýa raıy faktorlary jaǵdaıynda ǵana qosylady. Kóktaıǵaq, boran, tuman nemese jalpy qolaısyz aýa raıy jaǵdaılary týraly habarlamadan keıin buzýshylyqtardy tirkeý kameralarynyń parametrleri kórsetilgen jyldamdyqqa ózgertiledi. Aýa raıynyń nasharlaýy týraly eskertýlerde, sondaı-aq «ıAndeks», «2GIS», «Indrive» jáne basqa da qosymshalarda engizilgen jyldamdyq shegi týraly aqparat kórsetiledi. Joldardy ashý kezinde shekteýler alynyp tastalady, — dep túsindirdi Boranova. 

Bul rette ІІM ákimshilik polıtsııa komıtetiniń erekshe tapsyrmalar jónindegi aǵa ınspektory jol erejesin qatań saqtaýdy eskertti.

— Biz barshańyzdy jol erejelerin qatań saqtaýǵa jáne aýa raıynyń ózgerýin eskerýge shaqyramyz. Sizdiń jáne aınalańyzdaǵy adamdardyń qaýipsizdigi joldaǵy qyraǵylyǵyńyz ben jaýapkershiligińizge baılanysty ekenin eske salǵym keledi. Jyldamdyqty asyrmańyz, jolda sabyrlyq pen túsinistik tanytyńyz. Birlesip qana biz joldarymyzdy qaýipsiz ete alamyz! — dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.

Osyǵan deıin habarlanǵandaı, Qaraǵandy-Astana jolynda aýa raıy nasharlaǵanda jyldamdyqty qanshaǵa deıin tómendetý qajet ekenin jazǵan edik.