Elimizde tabıǵı mýltıaqýyzdyq shıkizat pen probıotıkter qosylǵan qurama jem ázirlenip jatyr
ASTANA. KAZINFORM – Qazirgi mal sharýashylyǵynyń damýy ekonomıkalyq turǵydan tıimdi jáne bıologııalyq qundylyǵy joǵary azyqpen qamtamasyz etýge tikeleı baılanysty bolyp otyr. Dástúrli aqýyzdyq komponentterdiń, ásirese aqýyzǵa baı qospalardyń qymbattaýy ónimniń ózindik qunyn arttyryp, onyń naryqtaǵy básekege qabilettiligin tómendetedi. Osy máseleni sheshý maqsatynda otandyq ǵalymdar qymbat aqýyzdyq komponentterdi almastyrý arqyly mal sharýashylyǵy ónimderiniń ózindik qunyn azaıtýǵa múmkindik beretin qurama jem tehnologııasyn ázirlep jatyr.
Aýyl sharýashylyǵy mınıstrliginiń habarlaýynsha, bul jumystar Qazaq ulttyq agrarlyq zertteý ýnıversıtetiniń tamaq jáne qaıta óńdeý ónerkásibi salasyndaǵy mamandary tarapynan júrgizilip keledi. Joba aıasynda janýarlardan alynatyn tabıǵı mýltıaqýyzdyq shıkizat, onyń ishinde et óńdeý ónerkásibiniń qaldyqtary – et-súıek, qan jáne súıek uny, sondaı-aq gıdrolızattar paıdalanylady. Atalǵan komponentter tolyqqandy aqýyz, almastyrylmaıtyn amınqyshqyldary men mıneraldy zattardyń mańyzdy kózi sanalady.
Ázirlenip jatqan tehnologııa fızıka-hımııalyq qasıetteri ártúrli shıkizatty óńdeý erekshelikterin eskeredi jáne usaqtaý, aralastyrý protsesterin ońtaılandyrýǵa baǵyttalǵan. Bul qurama jemniń birtektiligi men qaýipsizdigin qamtamasyz etedi.
Sonymen qatar jem quramyna iri qara maldyń mıkroflorasyn turaqtandyrýǵa, qorektik zattardyń sińimdiligin arttyrýǵa, zat almasý protsesterin jaqsartýǵa jáne asqazan-ishek joldarynyń aýrýlarynyń aldyn alýǵa yqpal etetin probıotıkalyq qospalar engiziledi.
Mýltıaqýyzdyq shıkizat pen probıotıkterdi birge qoldaný maldyń ónimdiligin arttyrýǵa, azyq konversııasyn jaqsartýǵa jáne qorektik zattardyń joǵalýyn azaıtýǵa baǵyttalǵan. Jobanyń júzege asyrylýy qurama jemniń ózindik qunyn tómendetýge, qaıtalama resýrstardy tıimdi paıdalanýǵa jáne qaıta óńdeý kásiporyndaryna túsetin ekologııalyq júktemeni azaıtýǵa múmkindik beredi.
Jobanyń negizgi maqsaty – aýyl sharýashylyǵy janýarlaryna arnalǵan tabıǵı mýltıaqýyzdyq shıkizat qosylǵan, probıotıkteri bar, qunarlylyǵy joǵary jáne jeńil qorytylatyn qurama jem óndirý tehnologııasyn jasaý. Bul tehnologııa mal sharýashylyǵy ónimderiniń sapasy men tıimdiligin arttyrýǵa baǵyttalǵan.
Eske salsaq, budan buryn aýyl sharýashylyǵy salasynda eki aqparattyq júıe ázirlenip jatqanyn habarlaǵanbyz.
