Elimizde sýrrogat sharty negizinde bosanǵan analar týraly málimet qupııa sanalady
ASTANA. KAZINFORM – Elimizde sýrrogat sharty negizinde bosanǵan analar týraly málimet qupııa sanalady. Bul týraly Densaýlyq saqtaý mınıstrliginen málim etti.
Sýrrogat ana talaptarǵa sáıkes týǵan balany onymen sýrrogat ana bolý shartyn jasasqan adamdarǵa berýge mindetti.
«Neke (erli-zaıyptylyq) jáne otbasy týraly» kodekstiń 59 babyna sáıkes, erli-zaıyptylar (tapsyrys berýshiler) sýrrogat ana bolý sharty negizinde qosalqy reprodýktıvtik ádister men tehnologııalardy qoldaný nátıjesinde týǵan balanyń ata-analary sanalady. Sýrrogat ana bolý shartyn jasasqan jubaı (tapsyrys berýshi) bala týǵannan keıin týý týraly medıtsınalyq kýálikte onyń anasy bolyp jazylady», - dep atap ótedi mınıstrlikten.
Vedomstvo málimetinshe, erli-zaıyptylardyń (tapsyrys berýshilerdiń) baladan bas tartýy onyń týylǵany tirkeýshi organda tirkelgennen keıin belgilengen tártippen resimdeledi.
«Sýrrogat anamen shart jasasqan erli-zaıyptylar (tapsyrys berýshiler) baladan bas tartqan jaǵdaıda, ana bolý quqyǵy óz qalaýy boıynsha sýrrogat anada qalatyn bolady. Al ol bas tartqan jaǵdaıda, bala memleket qamqorlyǵyna beriledi. Erli-zaıyptylar (tapsyrys berýshiler) baladan bas tartqan kezde jáne balany sýrrogat ana qabyldap alǵan kezde bul adamdar sýrrogat anaǵa shartta belgilengen mólsherde jáne tártippen ótemaqy tóleýge mindetti. Elimizde sýrrogat sharty negizinde bosanǵan analar týraly málimetter qupııa bolǵandyqtan, tikeleı mámileniń jasalǵan jerinen nemese jeke EKU ortalyqtarynan alynatyndyǵyn habarlaımyz», - delingen vedomstvo bergen jaýapta.
Buǵan deıin sýrrogat ana qyzmetine júgingen erli-zaıyptylardyń mindetin jazǵan edik.
