Elimizde sýrrogat alkogol óndirisi órship tur
ASTANA. KAZINFORM — 2024 jyly jáne 2025 jyldyń aǵymdaǵy kezeńinde sýrrogat alkogol óndirisine qatysty 54 is tirkedi.
Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.
— Qarjy monıtorıngi agenttigi 2024 jyly jáne 2025 jyldyń aǵymdaǵy kezeńinde sýrrogat alkogol óndirisi boıynsha 54 is tirkedi. 25 jerasty tsehy joıyldy, zańsyz aınalymnan 205,4 myń bótelke sýrrogat sýsyndary, 354 myń lıtrden astam spırt jáne quramynda spırti bar suıyqtyqtar, sondaı-aq 61 myń kontrafaktilik esepke alý jáne baqylaý belgileri alyndy. 2025 jyly jerasty tsehtarynda júrgizilgen esepke alý jáne baqylaý belgileri bar 9 320 bótelke kontrafaktili alkogol ónimi tárkilendi, — dedi vıtse-premer.
Onyń atap ótýinshe, alkogolızmniń aldyn alý jáne alkogoldi tutynýdy azaıtý turǵysynan Densaýlyq saqtaý mınıstrligi salaýatty ómir saltyn ustanatyn halyqtyń úlesin arttyrýǵa jáne minez-qulyq qaýip faktorlaryn tómendetýge baǵyttalǵan is-sharalardy iske asyryp jatyr. Jyl saıyn Ulttyq alkogolden bas tartý kúnine oraı aýqymdy aqparattyq naýqan ótkiziledi. Mádenıet jáne aqparat mınıstrligi múddeli memlekettik organdarmen birlesip, halyqty alkogoldi tutynýdyń zııany jáne onyń teris saldary týraly habardar etýge baǵyttalǵan aqparattyq-túsindirý jumystaryn júrgizedi.
— Zańsyz alkogoldi satý jáne taratýdy aldyn alý boıynsha ınternet jelisine turaqty monıtorıng júrgiziledi. 2024 jyly 18 ınternet-resýrs anyqtalyp, olarǵa tıisti nusqamalar jiberildi. Quqyq qorǵaý organdary azamattyq qoǵam ókilderimen, eriktilermen jáne jastar uıymdarymen («Dala qyrandary», «Jańa adamdar») birlesip, alkogol óniminiń zańsyz aınalymy faktileriniń jolyn kesý boıynsha turaqty reıdter uıymdastyrady. Óńirlerdegi jastar resýrstyq ortalyqtary jastardy salaýatty ómir saltyna tartýǵa jáne olardyń sporttyq daǵdylaryn damytýǵa baǵyttalǵan is sharalardy turaqty túrde ótkizedi, — dedi Ermek Kósherbaev.
Jaqynda Qyzylorda oblysynda bir aýyl alkogol ónimin satýdan bas tartqany belgili boldy.