Elimizde sýdıalardy irikteý júıesi túbegeıli ózgerdi
ASTANA. KAZINFORM — Endi elimizde sýdıalar jańa tártippen irikteledi. Tolyǵyraq Joǵarǵy sot keńesiniń múshesi Saltanat Júnisbekova aıtyp berdi.
Ne ózgerdi?
— emtıhan (test, esse, keıstik tapsyrmalar) jylyna 12 ret tapsyrylady, bul burynǵydan úsh ese jıi;
— psıhologııalyq testileý jylyna 3 ret emes, 10 ret ótkiziledi;
— kvalıfıkatsııalyq komıssııanyń úmitkerlermen áńgimelesý otyrystary aıyna 4 ret ótedi, al buryn ár eki aıda 1 ret bolatyn;
— Osylaısha, emtıhan tapsyrý úderisi 1,5 jyldan 3 aıǵa qysqardy.
Alaıda, bolashaq sýdıalarǵa qoıylatyn talaptar da kúsheıtildi.
— Quqyq qorǵaý jáne arnaıy organdardyń derekqory boıynsha qosymsha tekserý engizildi. Bul úmitkerdiń qylmystyq jolmen alynǵan kirisiniń bar-joǵyn, radıkaldy toptarǵa qatysynyń bar-joǵy, esirtki satý, tutynýǵa qatysynyń bar-joǵy, zańsyz qumar oıyndarǵa, tsıfrlyq aktıvterdiń kóleńkeli aınalymyna jáne basqa da qaýipterge qatysynyń bar-joǵyn anyqtaýǵa múmkindik beredi, — dedi Saltanat Júnisbekova ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, buryn úmitkerlerdiń shamamen 50%-y emtıhandy sátti tapsyrsa, qazir bul kórsetkish 20%-ǵa deıin azaıdy.
— Bul irikteý deńgeıiniń tómendegenin emes, sapanyń artqanyn bildiredi. Tek moraldyq jáne kásibı turǵydan shyndalǵan mamandar ǵana óte alady, — deıdi ol.
Salystyrmaly túrde aıtsaq, bıyl 6 aıda kvalıfıkatsııalyq komıssııa 18 otyrys ótip, nátıjesinde 125 adam barlyq kezeńnen ótti. Al ótken jyly 73 úmitker ǵana emtıhandy sátti tapsyrǵan.
Buǵan deıin habarlaǵanymyzdaı, búgin Qazaqstanda kassatsııalyq sottar jumysyn bastady.
