Elimizde sýdy zańsyz paıdalanǵandar endi qalaı anyqtalady
ASTANA. KAZINFORM — Sý resýrstary jáne ırrıgatsııa mınıstrligi resmı saýalymyzǵa joldaǵan jaýabynda salany avtomattandyrý jáne tsıfrlandyrý jóninde málimdedi.
— Qazirgi ýaqytta avtomattandyrylǵan esepke alý jabdyqtary 45 sýarý kanalynda, 8 sý qoımasynda, 13 gıdrotorapta jáne 150 tik drenaj uńǵymasynda ornatylyp, paıdalanylyp jatyr, — delingen habarlamada.
Sonymen qatar bul qurylǵylar jekelegen obektilerde de bolýy múmkin.
Al 2026 jyldyń sońyna deıin 178 sýarý kanaly men 558 tik drenaj uńǵymasyn avtomattandyrý josparlanǵan. Odan keıinde de bul baǵyttaǵy jumystar toqtamaıdy.
— Gıdrobeketter men sý alý qurylystaryn avtomattandyrylǵan ólsheý jáne qashyqtan derekter berý quraldarymen kezeń-kezeńimen jaraqtandyrý jalǵasady, — delingen resmı jaýapta.
Buǵan qosa, mınıstrlik Ulttyq sý resýrstary aqparattyq júıesin damytý barysy týraly da maǵlumat berdi. Bul platforma elimizdegi sý qoryn, sý sharýashylyǵy obektilerin jáne sý paıdalaný týraly derekterdi biryńǵaı tsıfrlyq alańda biriktirmek. Bul júıeniń arqasynda «Qazsýshar» RMK jáne basseındik ınspektsııalar aqparat almasady jáne ózara is-qımyldy qamtamasyz etedi.
Sonymen birge aýyl sharýashylyǵy taýaryn óndirýshiler alǵan sýdyń naqty kólemin onlaın rejımde kórýge múmkindik beretin biryńǵaı jappaı esepke alý júıesi daıyndalyp jatyr.
— Naqty sý kólemderin esepke alýdy odan ári avtomattandyrý úshin tehnıkalyq esepke alý modýli ázirlenip jatyr. Ol sý sharýashylyǵy jelisiniń tıisti ýchaskelerinde, onyń ishinde sý burý núktelerinde naqty berilgen sý kólemderi týraly derekterdi alý, berý jáne óńdeýdi kózdeıdi, — dep málimdedi mınıstrlik.
Aıta keteıik, buǵan deıin sý únemdeý maqsatynda qandaı jumystar atqarylyp jatqanyn jazǵanbyz.
