Elimizde sýdy tutynýdyń jańa tarıfi engiziledi
ASTANA. KAZINFORM – Bıyl 11 aqpannan bastap sýdy únemdi tutyný maqsatynda lımıtti 4 deńgeıli tarıfpen belgileý engiziledi. Bul týraly Sý resýrstary jáne ırrıgatsııa mınıstri Nurjan Nurjigitov málim etti.
«Sýdy únemdeý úshin Ulttyq ekonomıka mınıstrliginiń buıryǵymen 1 adamǵa shaqqandaǵy tutyný kóleminiń belgilengen normasy sheginde aýyz sý qyzmetterine tutyný kólemi boıynsha saralaý tetigi engizildi», - dedi Nurjan Nurjigitov Májiliste ótip jatqan «Respýblıkadaǵy sarqyndy sýlardy qaıta paıdalanýdyń problemalary men perspektıvalary» atty dóńgelek ústelde jasaǵan baıandamasynda.
Mınıstrdiń aıtýynsha, atalǵan buıryq 11 aqpanda kúshine endi. Bekitilgen buıryqta sýdy tutyný lımıtin 4 deńgeıli tarıfpen belgileý kózdelgen:
І top – aıyna 3 m3 deıin tutynýmen qoldanystaǵy tarıf qoldanylady (halyqtyń 49% tutynady);
ІІ top – aıyna 3-ten 5 m3-ke deıin tutynýmen, tarıf qoldanystaǵy tarıften +20%-ǵa joǵary (halyqtyń 20%-y tutynady);
ІІІ top – aıyna 5 m3-ten 10 m3-ke deıin tutynýmen, tarıf qoldanystaǵy tarıften +50%-ǵa joǵary (halyqtyń 20%-y tutynady);
ІV top – aıyna 10 m3 astam tutynýmen, tarıf qoldanystaǵy tarıften 100%-ǵa nemese 2 esege joǵary (halyqtyń 11%-y tutynady).
«Joǵaryda atalǵan tásildi qoldaný Ulttyq ekonomıka mınıstrligi derekteri boıynsha 13 mlrd teńge qosymsha tabys ákeledi. Tabıǵı monopolııalar sýbektileri bul qarajatty jeliler men jabdyqtardy rekonstrýktsııalaý, jelilerdiń tozý deńgeıin tómendetý jáne shyǵyndardy azaıtý baǵytyna jumsaıdy», - deıdi vedomstvo basshysy.
Qazir QR Parlament Májilisiniń Ekologııa máseleleri jáne tabıǵat paıdalaný komıtetiniń uıymdastyrýymen «Respýblıkadaǵy sarqyndy sýlardy qaıta paıdalanýdyń problemalary men perspektıvalary» atty dóńgelek ústel ótip jatyr.
