Elimizde sýdy tasyp iship otyrǵan qansha aýyl bar

ASTANA. KAZINFORM — Ónerkásip jáne qurylys vıtse-mınıstri Qýandyq Qajkenovten aýyzsýdy tasyp iship otyrǵan aýyl turǵyndarynyń jaǵdaıyn suraǵan edik.

— Qazir elimizdegi 6148 aýyldyń ishinde 5679 eldi meken sýmen jabdyqtaldy. Onyń ishinde 4420 aýyl ortalyqtandyrylǵan aýyzsý júıesine qosylǵan, sonymen qatar jergilikti bıýdjet esebinen 999 keshendi modýl qoıyldy. Sondaı-aq 260 aýylda qudyq jáne sý uńǵymalary ornatylǵan, — dep jaýap berdi Qýandyq Qajkenov Úkimet otyrysynan keıin ótken baspasóz máslıhatynda.

Ónerkásip jáne qurylys mınıstrliginiń málimetine súıensek, búginde respýblıkalyq menshikte jalpy sany 32 toptyq sý qubyry bar. Olar 1 mıllıon 393 myń halqy bar 581 eldi mekendi aýyzsýmen qamtyp otyr.

Sonymen qatar, qazir atalǵan vedomstvo sý ınfraqurylymyn jaqsartý maqsatynda 10 óńirde toptyq sý qubyry nysandaryn salý jáne qaıta jańartý boıynsha 31 jobany iske asyryp jatyr. Olardyń qatarynda Aqmola, Atyraý, Almaty, Ulytaý, Qaraǵandy, Qyzylorda, Mańǵystaý, Túrkistan, Batys Qazaqstan jáne Soltústik Qazaqstan oblysy bar.

Aıta ketsek, bıyl 53 eldi mekenge ortalyqtandyrylǵan aýyzsý júıesi alǵash ret qosylady. 

Buǵan deıin habarlaǵanymyzdaı, elimizde ulttyq sý resýrstary aqparattyq júıesi ázirlenip jatyr.