Elimizde sýarý kanaldary jańa tehnologııamen betondalýy múmkin
ASTANA. KAZINFORM — Sý resýrstary jáne ırrıgatsııa mınıstrligi men Nazarbaev Ýnıversıteti kanaldardy betondaýdyń ınnovatsııalyq tehnologııalaryn engizý salasyndaǵy yntymaqtastyqty talqylady.
Sý resýrstary jáne ırrıgatsııa mınıstri Nurjan Nurjigitov Nazarbaev Ýnıversıtetiniń vıtse-prezıdenti Gúlmıra Qanaımen kezdesti.
Taraptar sý sharýashylyǵy ınfraqurylymyn jańǵyrtý baǵytyndaǵy yntymaqtastyq máselelerin talqylady. Kezdesýde ırrıgatsııa kanaldaryna beton tóseýdiń ınnovatsııalyq tehnologııalaryn engizýge baǵyttalǵan eki birlesken ǵylymı-zertteý jobasyn iske asyrýdyń múmkindikteri qarastyryldy.
Mınıstrliktiń Sý resýrstarynyń aqparattyq-taldaý ortalyǵy eki jobaǵa da seriktes retinde qatysyp, memlekettik úılestirýge qatysty fýnktsııalardy qamtamasyz etedi.
Nurjan Nurjigitov eki jobany iske asyrý merzimderin, sondaı-aq qarjylyq jáne uıymdastyrýshylyq resýrstardy ońtaılandyrý maqsatynda olardy biryńǵaı keshendi jobaǵa biriktirýdi usyndy. Sonymen qatar jobaǵa Qazaq sý sharýashylyǵy ǵylymı-zertteý ınstıtýtyn tartý, usynylyp otyrǵan tehnologııalardyń tehnologııalyq jáne ekonomıkalyq artyqshylyqtaryn baǵalaý úshin «Qazsýshar» RMK nysandarynda elimizdiń barlyq óńiri boıynsha zerthana jáne dala zertteýlerin júrgizý, sondaı-aq bul tehnologııalardy tek sýarý kanaldaryna ǵana emes, basqa da sý sharýashylyǵy nysandarynda qoldaný múmkindigin qarastyrý jóninde usynystar aıtyldy.
— Mınıstrlik gıdrotehnıkalyq nysandardyń senimdiligin arttyrý jáne sý resýrstaryn utymdy paıdalaný maqsatynda sýarý kanaldaryna beton tóseýdiń ınnovatsııalyq tehnologııalaryn beıimdeý jáne engizý máselelerin zerdeleý jumystaryn jalǵastyryp keledi. Biz jetekshi zertteý joǵary oqý orny — Nazarbaev Ýnıversıtetimen áriptestigimizdi joǵary baǵalaımyz jáne onyń uzaq merzimdi ári ózara tıimdi yntymaqtastyqqa ulasatynyna senim bildiremiz, — dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin eki jylda elimizde 112,7 shaqyrym kanal betondalǵanyn jazǵan edik.
